თურქეთის პრეზიდენტი რეჯებ ტაიპ ერდოღანი აცხადებს, რომ ვეტოს დაადებს ფინეთისა და შვედეთის ნატოში გაწევრიანებას. იუწყება BBC თურქულ მედიაზე დაყრდნობით.
ამასთან, ერდოღანის თქმით, შვედეთის და ფინეთის დელეგაციები თურქეთში ჩასვლით "თავს ნუ შეიწუხებენ". მანამდე ცნობილი გახდა, რომ ჰელსინკი და სტოკჰოლმი ანკარაში დიპლომატების გაგზავნას გეგმავდნენ მოლაპარაკებების გამართვის მიზნით.
"თურქეთი ვერ დათანხმდება შვედეთისა და ფინეთის ნატოში გაწევრიანებას, რადგან ამ ქვეყნებმა უარი განაცხადეს ტერორისტების ექსტრადირებაზე და სანქციები დაუწესეს ანკარას. არცერთ ამ ქვეყანას არ აქვს მკაფიო და ცალსახა პოზიცია ტერორისტულ ორგანიზაციებთან მიმართებაში. თურქეთი ვერ იტყვის "დიახ" ნატოში იმ ქვეყნების გაწევრიანებაზე, რომლებმაც ანკარას სანქციები დაუწესეს. ნურავის ეწყინება", - ციტირებს მედია ერდოღანის სიტყვებს.
შეგახსენებთ, 15 მაისს ფინეთს პრეზიდენტმა და პრემიერ-მინისტრმა განაცხადეს, რომ ჰელსინკი ნატოში გაწევრიანების განაცხადის გაკეთებას გეგმავს. რამდენიმე საათში განცხადება გაავრცელა შვედეთის მმართველმა პარტიამ და მხარი დაუჭირა ნატოში გაწევრიანებას.
დღეს უკვე აღნიშნულ საკითხზე დებატები დაიწყო შვედეთსა და ფინეთის პარლამენტებში. ნატოში გაწევრიანების საკითხს ორივე ქვეყნის საკანონმდებლო ორგანოებში ფართო მხარდაჭერა აქვს.
თავის მხრივ, ჩრდილოატლანტიკური ალიანსი და მოკავშირეები (თურქეთის გარდა) აცხადებენ, რომ მიესალმებიან ახალ წევრებს და გაწევრიანების სწრაფ პროცედურას ჰპირდებიან.
