რუსეთის ბირთვული დოქტრინა ითვალისწინებს ბირთვული იარაღის გამოყენების შესაძლებლობას, თუ ქვეყანას ეგზისტენციალური საფრთხე დაემუქრება. ამის შესახებ გაეროში რუსეთის მუდმივი წარმომადგენლის პირველმა მოადგილემ დმიტრი პოლიანსკიმ ბრიტანულ გამოცემა Unherd News-თან ინტერვიუში განაცხადა.
"მე ვარ დიპლომატი და არა სამხედრო, არ ვარ იმ წრეებში, რომლებიც იღებენ გადაწყვეტილებას ბირთვული სტრატეგიის განხორციელებაზე. მაგრამ შემიძლია ვთქვა, რომ ჩვენ გვაქვს ბირთვული იარაღი და რუსეთისთვის ეგზისტენციალური საფრთხის შემთხვევაში, აბსოლუტურად დარწმუნებული ვარ, რომ ჩვენ შეგვიძლია გამოვიყენოთ იგი“, - განაცხადა მან.
დამაზუსტებელ კითხვაზე, თუ რას გულისხმობს "ეგზისტენციალურ საფრთხეში", პოლიანსკიმ უპასუხა, რომ თავად "არ არის ის, ვინც განსაზღვრავს ეგზისტენციალურ საფრთხეს".
"მე არ ვარ სამხედრო პირი, ჩემი საქმე არ არის ასეთი დასკვნების გამოტანა. მაგრამ თუ საქმე გაქვთ ბირთვულ სახელმწიფოსთან, რომლის სახელმწიფოებრიობას საფრთხე ემუქრება, მაშინ ყველა ვარიანტი უნდა იყოს განხილული, რაც მაგიდაზეა", - თქვა მან.
რუსეთისთვის "ეგზისტენციალური საფრთხეების" შემთხვევაში, ბირთვული იარაღის გამოყენების შესაძლებლობაზე კრემლის პრესსპიკერმა დმიტრი პესკოვმა ჯერ კიდევ მარტში ილაპარაკა. ისევე როგორც პოლიანსკის, არც პესკოვს განუმარტავს, რა იგულისხმება "ეგზისტენციალური საფრთხეების" მიღმა.
მანამდე, 27 თებერვალს პუტინმა დასავლეთი გააფრთხილა, რომ ბირთვული იარაღის გამოყენებას არ მოერიდება და რუსეთის არმიის შეკავების ძალები, ბირთვული იარაღის არსენალით, განსაკუთრებულ რეჟიმში გადაიყვანა.
