რუსეთის პრეზიდენტის ვლადიმირ პუტინის ერთ-ერთი უახლოესი მოკავშირე და უშიშროების საბჭოს თავმჯდომარის მოადგილე დიმიტრი მედვედევი ბირთვული ომის საფრთხეებზე კვლავ ალაპარაკდა.

მედვედევი გამოვიდა დასავლეთის გაფრთხილებით, რომ მისი მზარდი სამხედრო მხარდაჭერა უკრაინის მიმართ, ზრდის რუსეთსა და ნატოს შორის კონფლიქტის გაჩაღების რისკს.

ამავდროულად, ტელეგრამის არხზე გამოქვეყნებულ განცხადებაში, მედვედევი ამბობს, რომ ნატოსა და რუსეთს შორის შესაძლო კონფლიქტი, თავის მხრივ, ბირთვული ომის საშიშროებას ქმნის.

"უცხოელი ანალიტიკოსების გაუთავებელი საუბარი ნატოს რუსეთთან ომის თაობაზე არ ცხრება. უფრო მეტიც, დასავლელი "მოლაპარაკე თავების" ცინიზმი სულ უფრო მკვეთრი ხდება. ისინი მთელი ძალით ცდილობენ დღის წესრიგში შეიყვანონ თეზისი იმის შესახებ, რომ რუსეთი მსოფლიოს ბირთვული კონფლიქტით აშინებს.

დასავლეთის ქვეყნების მიერ რუსეთთან გაჩაღებული მარიონეტული ომის კონტექსტში, მსურს კიდევ ერთხელ ძალიან ნათლად ჩამოვთვალო ის, რაც ასე აშკარაა ყველა გონივრული ადამიანისთვის:

1. ნატოს ქვეყნების მიერ უკრაინაში იარაღის გადატუმბვა, მისი ჯარების მომზადება დასავლური აღჭურვილობის გამოსაყენებლად, დაქირავებული ჯარისკაცების გაგზავნა და წვრთნების ჩატარება ალიანსის ქვეყნების მიერ ჩვენს საზღვრებთან, ზრდის ნატოსა და რუსეთს შორის პირდაპირი და ღია კონფლიქტის გაჩაღებას;

2. ასეთ კონფლიქტს ყოველთვის ახლავს სრულფასოვან ბირთვულ ომად გადაქცევის რისკი;

3. ეს იქნება ყველასთვის კატასტროფული სცენარი.

სულ ეს არის. ამიტომ ნუ მოატყუებთ საკუთარ თავს და სხვებს. თქვენ უბრალოდ უნდა იფიქროთ თქვენი ქმედებების შესაძლო შედეგებზე", - წერს მედვედევი.

შეგახსენებთ, 26 მარტს მედვედევმა განიხილა 4 ვარიანტი, თუ რა შემთხვევაში გამოიყენებს რუსეთი ბირთვულ იარაღს.

ვაშინგტონში დაფუძნებული შეიარაღების კონტროლის ასოციაციის მონაცემების თანახმად, რუსეთი და შეერთებული შტატები მსოფლიოს უდიდესი ბირთვული ძალები არიან. რუსეთს აქვს დაახლოებით 6257 ბირთვული ქობინი, ხოლო ნატოს სამ ბირთვულ ძალას - აშშ-ს, დიდ ბრიტანეთს და საფრანგეთს - დაახლოებით 6065 ქობინი ერთად.