რუსეთის ბელგოროდის ოლქის გუბერნატორმა ვიაჩესლავ გლადკოვმა განაცხადა, რომ ოლქის ტერიტორიაზე "ტერორისტული საფრთხის ყვითელი დონე" გამოცხადდა, რომელიც 25 მაისამდე იმოქმედებს.

"25 მაისამდე ბელგოროდის რეგიონის ტერიტორიაზე მოქმედებს ტერორისტული საფრთხის "ყვითელი" დონე. შესაბამისი დოკუმენტი გაფორმებულია", - ნათქვამია მოკლე შეტყობინებაში.

გუბერნატორს ტერორისტული საფრთხის გამოცხადების მიზეზი არ დაუსახელებია.

ცოტა ხნით ადრე, "ტერორისტული საფრთხის ყვითელი დონე" გამოცხადდა კურსკის ოლქში.

ოლქის გუბერნატორმა რომან სტაროვოიტმა განაცხადა, რომ გადაწყვეტილება სამართალდამცავ ორგანოებთან შეთანხმებით მიიღო. შესაბამისი რეჟიმი 25 მაისამდე იმოქმედებს.

რუსული მედიის ინფორმაციით, კურსკში "ტერორისტული საფრთხის ყვითელი დონე" „უკრაინელი ნაციონალისტების“ შესაძლო პროვოკაციებთან დაკავშირებით დაინერგა.

"რეგიონში საფრთხის დონის მატებასთან დაკავშირებით შეიქმნა სადამკვირვებლო პუნქტები, სადაც მორიგეობენ სამხედროები და პოლიციელები, ასევე გაძლიერებულია დასახლებების პატრულირება", - იუწყება ინტერფაქსი.

ბოლო ხანებია, რუსეთის ხელისუფლება აცხადებს, რომ უკრაინული მხარე თავს ესხმის ბელგოროდის ოლქში მდებარე ობიექტებს, მათ შორის ნავთობი საცავებს. ბელგოროდის ადმინისტრაცია ასევე იუწყება, უკრაინელთა მხრიდან რუსული სოფლების მიმართ ცეცხლის გახსნის შესახებ.

სააგენტო "ინტერფაქსის" ცნობით, 24 თებერვლის შემდეგ, ბელგოროდის ოლქში, „უკრაინის მხრიდან დაბომბვისას 200-ზე მეტი საცხოვრებელი კორპუსი დაზიანდა“.
კურსკისა და ბელგოროდის ოლქები უკრაინის მოსაზღვრე ტერიტორიებია.