საფრანგეთში, საპრეზიდენტო არჩევნების მეორე ტური მიმდინარეობს, რომელშიც ერთმანეთს მოქმედი პრეზიდენტი, ემანუელ მაკრონი და "ეროვნული გაერთიანების" ლიდერი, მარინ ლე პენი უპირისპირდებიან.

საპრეზიდენტო არჩევნებში აშკარა ფავორიტად ითვლება ცენტრისტი ემანუელ მაკრონი, რომელიც საზოგადოებრივი აზრის გამოკითხვების თანახმად, მნიშვნელოვნად უსწრებს წინ ულტრამემარჯვენე ლე პენს. კანდიდატებს შორის სხვაობა კიდევ უფრო განამტკიცა მათმა ბოლო დებატებმა, რომლის "გამარჯვებულადაც" ადგილობრივმა ანალიტიკოსებმა ემანუელ მაკრონი მიიჩნიეს.

ქვეყნის მასშტაბით 70 000 საარჩევნო უბანი ადგილობრივი დროით 08:00 საათზე გაიხსნა .

ხმის მიცემის პროცედურა ადგილობრივი დროით 19:00 საათამდე გაგრძელდება, ხოლო პარიზში, ლილში, ბორდოში, მარსელსა და ტულუზაში - 20:00 საათამდე.

10 აპრილს ჩატარებული საპრეზიდენტო არჩევნების პირველი ტურის შედეგად, ემანუელ მაკრონმა ამომრჩეველთა ხმების 27.6%, ხოლო მარინ ლე პენმა - 23,41% მიიღო.