რუსეთის უმსხვილესი კერძო ნავთობკომპანიის "ლუკოილის" პრეზიდენტმა, მილიარდერმა ვაგიტ ალეკპეროვმა თანამდებობა დატოვა.
სააგენტო "ინტერფაქსის" ცნობით, ალეკპეროვმა ასევე დატოვა "ლუკოილის" დირექტორთა საბჭოს წევრის თანამდებობა.
ალეკპეროვის გადაწყვეტილების შესახებ 21 აპრილს ეცნობა კომპანიის დირექტორთა საბჭოს თავმჯდომარეს. თანამდებობის დატოვების შესახებ მიღებული გადაწყვეტილების მიზეზი განმარტებული არ არის.
როგორც ლუკოილის პრესსამსახური აღნიშნავს, ალეკპეროვი არ არის კომპანიის მაკონტროლებელი აქციონერი. მარტის ბოლოს ის ფლობდა და განკარგავდა ხმებს ლუკოილის აქციების 3,12%-თან მიმართებაში.
ვაგიტ ალეკპეროვი 1993 წლიდან არის ლუკოილის უმსხვილესი აქციონერი და პრეზიდენტი. ჟურნალი Forbes ბიზნესმენის ქონებას 10,5 მილიარდ დოლარად აფასებს. 2022 წლის 88 რუსი მილიარდერის სიაში ალეკპეროვი მე-10 ადგილზეა.
13 აპრილს, უკრაინაში რუსეთის შეჭრის ფონზე, დიდმა ბრიტანეთმა ალეკპეროვი სანქცირებულთა სიაში შეიყვანა. შეზღუდვები მოიცავს აქტივების გაყინვას და ბრიტანეთში შესვლის აკრძალვას.
