ევროპული საბჭოს პრეზიდენტის შარლ მიშელის განცხადებით, ბაქო და ერევანი შეთანხმდნენ ორ ქვეყანას შორის სამშვიდობო ხელშეკრულების მომზადებაზე.
"აზერბაიჯანის პრეზიდენტმა ილჰამ ალიევმა და სომხეთის პრემიერ-მინისტრმა ნიკოლ ფაშინიანმა გამოთქვეს სურვილი, სწრაფად დაიწყონ სვლა სამშვიდობო ხელშეკრულებისკენ და შეთანხმდნენ, რომ მისი მომზადება საგარეო საქმეთა მინისტრებს მიანდონ", - ნათქვამია ევროპული საბჭოს განცხადებაში, რომელიც ბრიუსელში შარლ მიშელისა და კავკასიის ორი სახელმწიფოს ლიდერების შეხვედრის შემდეგ გავრცელდა.
ამასთან, ვრცელდება ინფორმაცია, რომ აპრილის ბოლომდე მოწვეული იქნება ერთობლივი კომისია საზღვრის დელიმიტაციისა და დემარკაციისათვის, ასევე მოსაზღვრე რაიონებში სტაბილურობისა და უსაფრთხოების უზრუნველყოფისათვის.
მხარეებმა ასევე დაადასტურეს 2020 წლის 9-10 ნოემბრის სამმხრივი განცხადების დებულებების სრულად შესრულების აუცილებლობა.
ამავდროულად, შარლ მიშელმა კიდევ ერთხელ დაადასტურა ევროკავშირის ერთგულება სომხეთსა და აზერბაიჯანთან თანამშრომლობის გაღრმავების შესახებ. მან ასევე ხაზი გაუსვა ერთობლივი ძალისხმევის აუცილებლობას დაძაბულობის დასაძლევად, რათა ხელი შეუწყონ სამხრეთ კავკასიის, როგორც უსაფრთხო, სტაბილური, მშვიდობიანი და აყვავებული რეგიონის განვითარებას იქ მცხოვრები ყველა ადამიანის სასარგებლოდ.
შარლ მიშელმა ხაზი გაუსვა ყველა მნიშვნელოვანი ჰუმანიტარული საკითხის სრული და სწრაფი მოგვარების საჭიროებას, მათ შორის დარჩენილი დაკავებულების გათავისუფლების და უგზო-უკვლოდ დაკარგული პირების საკითხის მოგვარების. ევროკავშირი მზადყოფნას გამოთქვამს, დაეხმაროს ამ ძალისხმევას.
ილჰამ ალიევსა და ნიკოლ ფაშინიანს შორის ბრიუსელში შეხვედრა 6 აპრილს შარლ მიშელის შუამავლობით გაიმართა.
