ამერიკელთა რაოდენობა, რომლებიც რუსეთს მტრად მიიჩნევენ 70%-მდე გაიზარდა, - ასეთია ახალი კვლევის შედეგები, რომელიც კვლევითმა ორგანიზაციამ Pew Research Center-მა გამოაქვეყნა.
Pew Research Center-ის ცნობით, უკრაინაში რუსეთის შეჭრის შემდეგ, ამერიკელების დამოკიდებულება რუსეთის მიმართ მკვეთრად შეიცვალა. იანვარში რუსეთს შეერთებული შტატების მტრად ამერიკელთა 41% მიიჩნევდა, მარტში კი ეს მაჩვენებელი 70%-მდე გაიზარდა.
ზოგადად, გამოკითხულთა 92%-ს რუსეთის მიმართ ცუდი დამოკიდებულება აქვს. 2020 წელს ეს მაჩვენებელი 83%-ს შეადგენდა.
ამერიკელთა მხოლოდ 6% ენდობა ვლადიმირ პუტინს. 72% კი ენდობა უკრაინის პრეზიდენტს ვლადიმირ ზელენსკის.
და თუ ადრე რუსეთისადმი დამოკიდებულება ნაწილობრივ განისაზღვრებოდა რესპონდენტთა პოლიტიკური შეხედულებებით - რესპუბლიკელები უფრო მეტად იყვნენ მიდრეკილნი რუსეთისადმი თანაგრძნობისკენ, ვიდრე დემოკრატები - ახლა ასეთი განსხვავება პრაქტიკულად არ არსებობს. ორივე მხარის მხარდამჭერები თითქმის ერთნაირად უარყოფითად არიან განწყობილნი რუსეთის მიმართ.
გამოკითხვა 21-დან 27 მარტის ჩათვლით ჩატარდა და მასში 3581 რესპონდენტი იყო ჩართული.
