პოლონეთი მიესალმება ევროპაში ამერიკელი ჯარისკაცების რაოდენობის 50%-ით გაზრდას. ამის შესახებ მმართველი პარტიის ლიდერმა და ვიცე-პრემიერმა იაროსლავ კაჩინსკიმ გერმანულ გამოცემა Welt-თან ინტერვიუში განაცხადა.
"პოლონეთი მოხარული იქნება თუ ამერიკის შეერთებული შტატები, რუსეთის მზარდი აგრესიულობის გათვალისწინებით, გაზრდის თავის სამხედრო ყოფნას ევროპაში, ამჟამინდელი 100 000 ამერიკელი ჯარისკაციდან 150 000 ჯარისკაცამდე. აქედან 75 000 ჯარისკაცი განლაგებული უნდა იყოს აღმოსავლეთ ფლანგზე, რუსეთის საზღვართან, 50 000 ჯარისკაცი კი ბალტიისპირეთში და პოლონეთში", - თქვა კაჩინსკიმ.
ამასთან, იაროსლავ კაჩინსკი აცხადებს, რომ უნდა დაიწყონ ფიქრი აღმოსავლეთ ევროპაში ამერიკული ბირთვული იარაღის მუდმივი განლაგების თაობაზე. კაჩინსკიმ დასძინა ამასთან დაკავშირებით ინიციატივა ვაშინგტონისგან უნდა მოდიოდეს. მისივე თქმით, ეს საკითხი ჯერჯერობით არ განიხილება.
"თუ ამერიკელები შემოგვთავაზებენ, რომ პოლონეთში ბირთვული იარაღი განლაგდეს, ჩვენ ამ საკითხში ღია ვიქნებით", - თქვა ვიცე-პრემიერმა.
კაჩინსკი ასევე ითხოვს ნატოს ახალი სამეთაურო ცენტრის შექმნას პოლონეთში.
