გაეროს ომის დანაშაულების ტრიბუნალების ყოფილი მთავარი პროკურორი კარლა დელ პონტე უკრაინაში შეჭრის გამო, რუსეთის პრეზიდენტ ვლადიმირ პუტინის დაპატიმრებას ითხოვს.
კარლა დელ პონტე ყოფილი იუგოსლავიის (ICTY) და რუანდის (ICTR) საკითხებში გაეროს სისხლის სამართლის საერთაშორისო ტრიბუნალების მთავარ პროკურორად მუშაობდა.
დელ პონტემ განაცხადა, რომ პუტინისა და სხვა მაღალი რანგის ჩინოვნიკების წინააღმდეგ საერთაშორისო დაკავების ორდერი უნდა გაიცეს.
"პუტინი ომის დამნაშავეა", - განუცხადა მან შვეიცარიულ გაზეთ Le Temps-ს.
უკრაინაში შესაძლო ომის დანაშაულების გამოძიება გასულ თვეში მას შემდეგ დაიწყო, რაც რუსეთი მშვიდობიანი მოსახლეობის დაბომბვაში დაადანაშაულეს.
სისხლის სამართლის საერთაშორისო სასამართლოს (ICC) მთავარმა პროკურორმა, კარიმ ხანმა განაცხადა, რომ მტკიცებულებები გროვდება სავარაუდო გენოციდის, ომის დანაშაულებსა და კაცობრიობის წინააღმდეგ ჩადენილ დანაშაულებთან დაკავშირებით.
აღსანიშნავია, რომ რუსეთი არ არის სისხლის სამართლის საერთაშორისო სასამართლოს წევრი (რომის სტატუტი) და საკუთარ მოქალაქეებს არ გადასცემს მას გასასამართლებლად.
როდესაც აშშ-ის პრეზიდენტმა ჯო ბაიდენმა გასულ თვეში პუტინი "ომის დამნაშავედ" მოიხსენია, კრემლმა თქვა, რომ მისი სიტყვები "უპატიებელია".