შეერთებული შტატები თავისი სტრატეგიული მარაგებიდან მილიონობით ბარელი ნავთობის გაცემას დაიწყებს. ინფორმაციას თეთრი სახლი ავრცელებს.
თეთრი სახლის განცხადებით, პრეზიდენტი ჯო ბაიდენი აღნიშნულთან დაკავშირებით განცხადებას უახლოეს ხანებში გააკეთებს.
გავრცელებული ცნობით, აშშ მომდევნო ექვსი თვის განმავლობაში ყოველდღიურად 1 მილიონ ბარელ ნავთობს გასცემს.
აშშ-ის მთავრობა იმედოვნებს, რომ ეს ნაბიჯი შეაჩერებს ფასების ზრდის ტენდენციას, რომელიც უკრაინაში რუსეთის შეჭრის ფონზე მიმდინარეობს.
სტრატეგიული მარაგებიდან ნავთობის გაცემის შესახებ ინფორმაციის გავრცელებისთანავე, ნავთობის ფასებმა უკვე დაიწყეს ვარდნა.
"ამერიკის ხმის" ინფორმაციით, მაისისთვის "ბრენტის" ვადიანი გარიგებები 6.95 დოლარით, ანუ 6.13 პროცენტით 106.6 დოლარამდე შემცირდა. მაისის კონტრაქტი ხუთშაბათს მთავრდება და ყველაზე აქტიური ვაჭრობა მიმდინარეობდა ივნისის ვადიან გარიგებებზე, რომელზეც ფასი 6.66 დოლარით, 104.78 დოლარამდე დაეცა.
"გოლდმენ საქს"-ის ანალიტიკოსებმა თქვეს, რომ შესაძლოა ეს ნაბიჯი ნავთობის ბაზრებს 2022 წელს ხელახლა დაბალანსებაში დაეხმაროს, მაგრამ საკითხს საბოლოოდ ვერ გადაჭრის.
