გერმანიის მთავრობის განცხადებით, ბერლინმა მიიღო რუსეთისგან გარანტიები, რომ ევროპას არ მოუწევს რუსული გაზის ღირებულების რუბლით გადახდა. ამის შესახებ გერმანიის კანცლერ ოლაფ შოლცისა და რუსეთის პრეზიდენტ ვლადიმირ პუტინს შორის სატელეფონო საუბრის შემდეგ გახდა ცნობილი.
კანცლერ ოლაფ შოლცის ოფისის განცხადებით, პუტინმა უთხრა გერმანიის კანცლერს, რომ ევროპულ კომპანიებს შეუძლიათ განაგრძონ გადახდები ევროში ან დოლარში.
ოლაფ შოლცთან სატელეფონო საუბარში ვლადიმერ პუტინმა განაცხადა, რომ თანხა გადაირიცხება "გაზპრომ" ბანკში და შემდეგ რუბლში გადაკონვერტირებული გადაირიცხება რუსეთში. აღნიშნული ბანკი ამჟამად ევროკავშირის სანქციებს არ ექვემდებარება.
გავრცელებული ცნობით, პუტინმა შოლცს აცნობა ხელმოწერილი კანონის შესახებ, რომლის მიხედვითაც, 1 აპრილიდან გაზის მიწოდება რუბლით უნდა განხორციელდეს, თუმცა საუბარში ხაზგასმით აღნიშნა, რომ ევროპელი სახელშეკრულებო პარტნიორებისთვის არაფერი შეიცვლება.
"ენერგომომარაგების გადახდა გაგრძელდება ექსკლუზიურად ევროში, ან დოლარში, როგორც მითითებულია კონტრაქტებში", - დასძინა წარმომადგენელმა.
შეგახსენებთ, გასულ კვირას, რუსეთის პრეზიდენტმა პუტინმა გადაწყვიტა, "არამეგობრულ ქვეყნებს" რუსული გაზის საფასურის გადახდა რუბლით განეხორციელებინათ. პუტინის ამ გადაწყვეტილებას "დიდი შვიდეული" გამოეხმაურა და განაცხადა, რომ გაზის საფასურის რუბლით გადახდას არ აპირებენ.
