ევროკომისიის ანტიმონოპოლიური ოფისის წარმომადგენლებმა გერმანიაში რუსული ენერგოგიგანტის "გაზპრომის" ფილიალის ოფისებში ჩაატარეს ჩხრეკა რეკორდულად გაზრდილი ფასებთან მისი კავშირის გამოძიების ფარგლებში. ინფორმაციას Bloomberg-ი წყაროზე დაყრდნობით ავრცელებს.
გამოძიების ცნობით, ჩხრეკა ჩატარდა Gazprom Germania GmbH-სა და Wingas GmbH-ის კომპანიების ოფისებში, რომლებიც გერმანიის ბაზრის 20 პროცენტს ამარაგებენ.
ჩხრეკა ჩატარდა ევროპაში გამოძიების გააქტიურების ფონზე, განაპირობა თუ არა "გაზპრომის" ქმედებებმა გაზის ფასის მკვეთრი ზრდა და რეგიონში ენერგეტიკული კრიზისის გაძლიერება.
გამოცემა Politico-ს ცნობით, ბრიუსელმა ოქტომბერში დაიწყო მტკიცებულებების შეგროვება იმის დასადგენად, ახორციელებდნენ თუ არა გაზპრომი და გაზის სხვა მომწოდებლები ბაზარზე ფასებით მანიპულირებას.
იანვარში, კონკურენციის საკითხებში ევროკომისარმა მარგრეტე ვესტაგერმა განაცხადა, რომ ის ჯერ კიდევ ელოდება ინფორმაციას "გაზპრომისგან".
"ნამდვილად დამაფიქრებელია, რომ კომპანია, მზარდი მოთხოვნის გათვალისწინებით, ზღუდავს მიწოდებას”, - განუცხადა ვესტაგერმა ჟურნალისტებს. ”ეს საკმაოდ იშვიათი ქცევაა ბაზარზე," - თქვა მან.
მედიის ინფორმაციით, გერმანიის ოფისებში წარმოებული ჩხრეკა შესაძლოა ნიშანი იყოს იმისა, რომ ვესტაგერი ოფიციალურ გამოძიებას წამოიწყებს გაზპრომთან დაკავშირებით.
