სირიის პრეზიდენტი ბაშარ ალ-ასადი პირველად ეწვია არაბულ ქვეყანას 2011 წელს სირიაში სამოქალაქო ომის დაწყების შემდეგ. იტყობინება სირიის სახელმწიფო სააგენტო Sana.
18 მარტს დიქტატორი ასადი არაბთა გაერთიანებულ საამიროებში ჩავიდა.
გავრცელებული ინფორმაციით, ასადმა მოლაპარაკება გამართა აბუ დაბის მეფისნაცვალთან და დე ფაქტო მმართველთან შეიხ ხალიფა ბინ ზაიდ ალ ნაჰიანთან და დუბაის ამირასთან შეიხ მუჰამედ ბინ რაშიდ ალ მაქტუმთან.
ვიზიტ ამსახველი კადრები Sana-მ და არაბულმა სააგენტო Wam-მ გაავრცელეს.
"სხვა საკითხებთან ერთად, მოლაპარაკებები მოიცავდა სირიიდან უცხოური ჯარების გაყვანას და სირიისა და მისი ხალხისთვის პოლიტიკური და ჰუმანიტარული მხარდაჭერის უზრუნველყოფას", - იტყობინება WAM.
სააგენტო dpa-ს ინფორმაციით, ბაშარ ალ-ასადის ვიზიტი არაბეთის გაერთიანებულ საამიროებში კიდევ ერთი ნიშანია იმისა, რომ სირიის რეჟიმის იზოლაცია არაბულ სამყაროში დასრულდა და დამასკო შესაძლოა მალე დაუბრუნდეს არაბულ სახელმწიფოთა ლიგას (LAS).
არაბულ სახელმწიფოთა ლიგაში სირიის წევრობა 2011 წელს შეჩერდა სირიაში ანტისამთავრობო საპროტესტო აქციების სასტიკი ჩახშობის ფონზე, რომელიც სამოქალაქო ომში გადაიზარდა.
არაბთა გაერთიანებულმა საამიროებმა სირიასთან ურთიერთობა 2012 წელს გაწყვიტა.
სირიის დიქტატორი ასადი რუსეთის პრეზიდენტ პუტინის მტკიცე მოკავშირეა. სირიის სამოქალაქო ომში, მოსკოვის მხარდაჭერით, ასადის ძალებმა ბოლო წლებში დაიბრუნეს კონტროლი ქვეყნის დიდ ნაწილზე. მოსკოვი ამჟამად სირიაში ათასობით მებრძოლს აგროვებს უკრაინის წინააღმდეგ ომისთვის.
