რუსეთის კოსმოსურმა სააგენტომ, "როსკოსმოსმა" უარყო ინფორმაცია, რომ რუს კოსმონავტებს ყვითელი ფერის სამოსი უკრაინის მხარდასაჭერად ეცვათ.
უწყების პრესსამსახურმა ტელეგრამის არხზე დაწერა: "ზოგჯერ ყვითელი უბრალოდ ყვითელია".
"ახალი ეკიპაჟის საფრენი კოსტიუმები დამზადებულია ბაუმანის მოსკოვის სახელმწიფო ტექნიკური უნივერსიტეტის ფერებში, რომელიც სამივე კოსმონავტმა დაამთავრა... ყველგან და ყველაფერში უკრაინის დროშის ნახვა სიგიჟეა".
ინფორმაციას გამოეხმაურა "როსკოსმოსის" გენერალური დირექტორი დიმიტრი როგოზინი. მისი მტკიცებით, "რუს კოსმონავტებს უკრაინელი ნაციონალისტების მიმართ სიმპათიები არ გააჩნიათ".
საერთაშორისო კოსმოსური სადგურიდან პირდაპირი ეთერით გამართულ პრესკონფერენციაზე, ვეტერანმა კოსმონავტმა, მისიის მეთაურმა, ოლეგ არტემიევმა განაცხადა:
"თითოეული ეკიპაჟი ირჩევს ფერს, რომელიც სხვადასხვაგვარად გამოიყურება. ფერის არჩევანი ამჯერად ჩვენ გვეკუთვნოდა. სიმართლე ის არის, რომ ჩვენ ბევრი ყვითელი ქსოვილი გვქონდა დაგროვილი და საჭირო იყო მისი გამოყენება. ამიტომ მოგვიწია ყვითელი ფრენის კოსტუმების ტარება."
