რუსული მედიის ინფორმაციით, რუსეთში Instagram-ის ანალოგი სოციალური ქსელი "როსგრამი" იქმნება, რომლის ინიციატივა რუს ინტერნეტ-მარკეტოლოგ ალექსანდრ ზობოვს ეკუთვნის.
ზობოვის თქმით, "როსგრამი" 28 მარტიდან ჩაეშვება Android-სა და iOS-ის მობილური მოწყობილებისათვის. დანარჩენი მომხმარებლებისთვის კი აპრილიდან იქნება ხელმისაწვდომი.
რუსეთის მედიის მარეგულირებელმა ორგანომ, "როსკომნადზორმა" რუსეთის ტერიტორიაზე Instagram-ი 11 მარტს დაბლოკა.
"როსკომნადზორის" მტკიცებით, Instagram-ზე ვრცელდება პუბლიკაციები რუსეთის მოქალაქეების, მათ შორის სამხედრო პერსონალის ძალადობრივი ქმედებების ჩადენის მოწოდებით.
მანამდე, 4 მარტს "როსკომნადზორმა" რუსეთში Facebook-ი და Twitter-ი დაბლოკა.
