უკრაინელი ლტოლვილებისთვის, რომელთაც დიდი ბრიტანეთში სურთ ჩასვლა, ახალი გამარტივებული პროცედურა ამოქმედდება. განაცხადა დიდი ბრიტანეთის შინაგან საქმეთა მდივანმა პრიტი პალეტმა თემთა პალატაში გამოსვლისას.
მომავალი სამშაბათიდან, უკრაინელ ლტოლვილებს არ დასჭირდებათ ვიზის განაცხადის ცენტრში მისვლა. ამის ნაცვლად, მათ შეეძლებათ სპეციალური სააპლიკაციო ფორმა ონლაინ შეავსონ.
"უკრაინის ეროვნული პასპორტის მქონე უკრაინელებს შეეძლებათ, სადაც უნდა იყვნენ, ვიზის მისაღებად საჭირო განაცხადები ონლაინ რეჟიმში შეავსონ. მათ არ დასჭირდებათ სავიზო მომსახურების ცენტრებში მისვლა", - თქვა პატელმა.
პრიტი პატელის განცხადებით, სავიზო პროცედურა უკრაინელი ლტოლვილებისთვის სრულად ონლაინ რეჟიმში წარიმართება, პასუხსაც ელექტრონული ფოსტის საშუალებით მიიღებენ.
თანხმობის შემთხვევაში, უკრაინელი ლტოლვილები ქვეყანაში შესვლის ნებართვის დამადასტურებელ ცნობას საზღვრის კვეთისას მიიღებენ.
მანამდე, ბრიტანეთს აკრიტიკებდნენ სავიზო ცენტრების არარსებობის გამო, რაც ართულებდა ვიზების განაცხადების გაკეთების შესაძლებლობას უკრაინელი ლტოლვილებისთვის.
ბრიტანეთში მოქმედი უკრაინის საოჯახო სქემა დიდ ბრიტანეთში დასახლებული ადამიანების ოჯახის წევრებს საშუალებას აძლევს შეუერთდნენ თავიანთ ნათესავებს.
