პეკინი უარს ამბობს რუსეთის უკრაინაში შეჭრის მკაფიო დაგმობაზე, მაგრამ ცდილობს პუტინის ომისგან დისტანცირებას დიალოგისა და სუვერენიტეტის პატივსცემის მოწოდებებით.
ჩინეთის საგარეო საქმეთა მინისტრმა ვან იმ ორშაბათს გამართულ პრესკონფერენციაზე რუსეთს "პეკინის ყველაზე მნიშვნელოვანი სტრატეგიული პარტნიორი" უწოდა.
ვან იმ თქვა, რომ მოსკოვთან კავშირები "ერთ-ერთი ყველაზე მნიშვნელოვანი ორმხრივი ურთიერთობაა მსოფლიოში".
"რაც უნდა სახიფათო იყოს საერთაშორისო ლანდშაფტი, შევინარჩუნებთ ჩვენს სტრატეგიულ ფოკუსს და ხელს შევუწყობთ ჩინეთ-რუსეთის ყოვლისმომცველი პარტნიორობის განვითარებას ახალ ეპოქაში", - განუცხადა ვან იმ ჟურნალისტებს.
"ორი ხალხის მეგობრობა კლდესავით მტკიცეა", - დასძინა ჩინელმა დიპლომატმა.
ამავდროულად, ჩინეთის საგარეო საქმეთა მინისტრმა აღნიშნა, რომ პეკინი მზად არის შუამავლობა იკისროს რუსეთსა და უკრაინას შორის.
"ჩინეთი მზადაა განაგრძოს კონსტრუქციული როლის შესრულება სამშვიდობო მოლაპარაკებების ხელშეწყობაში და იმუშაოს საერთაშორისო თანამეგობრობასთან ერთად შუამავლობის გასაწევად, საჭიროების შემთხვევაში," - თქვა მინისტრმა.
ჩინეთი მხარს არ უჭერს დასავლეთის ქვეყნების მიერ, უკრაინაში შეჭრის გამო, რუსეთისთვის დაწესებულ სანქციებს.
პეკინი ამბობს, რომ ყველა ქვეყნის სუვერენიტეტი და ტერიტორიული მთლიანობა უნდა იყოს დაცული, მაგრამ სანქციები ახალ პრობლემებს ქმნის და ძირს უთხრის კონფლიქტის პოლიტიკური მოგვარების პოტენციურ ძალისხმევას.
