რუსული მედიის ინფორმაციით, რუსეთის საოკუპაციო ძალები, ვლადიმირ პუტინის მიმართ საფრანგეთის პრეზიდენტ ემანუელ მაკრონის თხოვნის შედეგად უკრაინაში ადგილობრივი დროით, დილის 9 საათიდან სიჩუმის რეჟიმს აცხადებს და ჰუმანიტარულ დერეფნებს ხსნის.
რუსული მედიის ცნობით, ოკუპანტები ჰუმანიტარულ დერეფნებს გახსნიან სუმის, კიევის, მარიუპოლისა და ხარკოვის მოსახლეობისათვის.
რუსული მედია წერს, რომ რუსეთის ფედერაციის შეიარაღებული ძალები განახორციელებენ ევაკუაციის უწყვეტ მონიტორინგს, მათ შორის უპილოტო საფრენი აპარატების გამოყენებით.
მიუხედავად ამ განცხადებისა, ჯერჯერობით უცნობია, შეასრულებს თუ არა პირობას რუსული მხარე. გასული კვირის ბოლოს, წითელი ჯვრის საერთაშორისო კომიტეტის მედიაციით, რუსეთმა "დუმილის რეჟიმი" გამოაცხადა მარიუპოლისა და ვოლნოვახის მცხოვრებთა ევაკუაციისთვის, თუმცა ევაკუაცია ჩაიშალა. რუსეთმა და უკრაინამ ცეცხლის შეწყვეტის რეჟიმის დარღვევაში ერთმანეთი დაადანაშაულეს.
ფოტოზე: უკრაინელი ქალი რუსეთის მიერ ირპინის დაბომბვის დროს
