უკრაინაში ტყვედჩავარდნილი რუსი სამხედროები რუსეთის მოქალაქეებს მოუწოდებენ გააკეთონ ყველაფერი ომის დასასრულებლად.
"რუსებო, ყველაფერი გააკეთეთ იმისათვის, რომ ეს ომი დამთავრდეს. ის არ სჭირდება არც უკრაინას, არც რუსეთს. ეს ომი სჭირდება მხოლოდ პუტინს", - განაცხადა ტყვე ანდრეი ჩუვატარევსკიმ სააგენტო „ინტერფაქს-უკრაინაში“ პრესკონფერენციაზე. ის საკონტრაქტო სამსახურს მოსკოვის ოლქში გადიოდა.
მან ასევე თანამოქალაქეებს მოუწოდა გამოვიდნენ მიტინგებზე, გადაკეტონ ფედერალური დანიშნულების მაგისტრალები და რუსეთის ტექნიკას გადაადგილების საშუალება არ მისცენ. „შეეცადეთ თქვენი ხმა გააგებინოთ პრეზიდენტს, მოაშორეთ სამხედროები ტექნიკას, რათა არ დაბომბონ მშვიდობიანი მოსახლეობა. თუ თქვენ ქუჩებში გამოხვალთ, პრეზიდენტი მიიღებს გადაწყვეტილებას ჯარების გამოხმობის შესახებ და ომი არ იქნება“, - ამბობს რუსი ტყვე.
შეკითხვაზე აცნობიერებს თუ არა რუსეთის ხელისუფლების მოტივებს უკრაინაში შეჭრასთან დაკავშირებით, ჩუვატარევსკიმ უპასუხა, რომ არა.
"მე არ ვიცი რა მიზნებისთვის. როგორც ჩანს მას უნდა უბრალოდ ტერიტორიები და მიწები. ჩვენ ეს არ გვინდა“, - აღნიშნა მან და განაცხადა, რომ რუსეთის არმიაში სამსახური არავის უნდა.
"არმიაში სამსახური არავის უნდა. წვრთნებზე წასვლის სურვილიც არ გვქონდა ცივილიზაციისაგან შორს... ჩვენ გვძულს ჩვენი ხელმძღვანელობა, რომელმაც აქ გამოგვგზავნა. ვხვდებით, რომ აქ არავის ვუნდივართ, თავი გვიკრეს აქ მთავრობის ზრახვების შესასრულებლად“, - თქვა ტყვე სამხედრომ.
მან ასევე მიმართა დარბაზში მყოფ უცხოელ ჟურნალისტებს, გაავრცელონ აღნიშნული ინფორმაცია იმისთვის, რომ მათი ქვეყნების პრეზიდენტებმა ზეწოლა მოახდინონ პუტინზე ომის შეწყვეტის მიზნით. „ჩვენ ამის იმედი გვაქვს“, - თქვა ჩუვატარევსკიმ.
კიდევ ერთი ტყვის, ჯარისკაც მიხაილ კულიკოვის თქმით, რუსეთის მოქალაქეებმა უნდა გამოიჩინონ ძალისხმევა, რათა უკრაინაში აღარ ზარალდებოდნენ რუსი და უკრაინელი შვილები.
„რუსო ხალხო, აღსდექით, აქ თქვენი შვილები არიან. აქ უკრაინელი ხალხის შვილები იტანჯებიან. ნურავისი გეშინიათ. უკრაინელ ხალხს არავისი ეშინია. ისინი თავიანთ მიწას სიცოცხლის უკანასკნელ წუთამდე დაიცავენ. მეც მყავს სახლში ორი პატარა შვილი, რომლებსაც არ ვიცი შევხვდები თუ არა. მშობლებო, გადაკეტეთ გზები, არ გამოუშვათ თქვენი შვილები, გააკეთეთ ყველაფერი, რომ რუსეთის ჯარი უკან გაბრუნდეს“, - თქვა კულიკოვმა.
ამასთან, ტყვემ დმიტრი გაგარინმა რუსეთში თავის ოჯახსა და ახლობლებს მიმართა, არ მოუსმინონ რუსულ პროპაგანდას.
„მინდა, რომ რუსეთის ფედერაციაში მცხოვრებმა ყველა ადამიანმა გაიგოს, აქ, უკრაინაში ყველაფერი ისე არ არის, როგორც რუსეთის ტელევიზიები ლაპარაკობენ. აქ არ არიან ბანდერელები, არ არიან ნაცისტები. აქ ჩვეულებრივი მშვიდობიანი ადამიანები არიან, რომლებიც გაერთიანდნენ ერთი ადამიანის - პუტინის წინააღმდეგ. ადამიანის, რომელსაც უნდა ყველაფრის დამპყრობელი იყოს. მინდა, რომ ეს ყველაფერი რაც შეიძლება მალე დამთავრდეს. აქ ყველაფერი ისე არ არის, როგორც ჩვენი მედიასაშუალებები ყვებიან და ხალხს აზომბებენ“, - თქვა რუსმა ტყვემ.
„ადამიანებო, გამორთეთ ტელევიზორები, ნუ მოუსმენთ პუტინს, დაითანხმეთ ოჯახის წევრები, ახლობლები, აქ ჩამოვიდნენ. ერთადერთი დამნაშავეები აქ არიან ისინი, ვინც რუსეთიდან ჩამოვიდა, როგორც პუტინი ამბობს უკრაინელების „დამცველები“. მინდა, რომ რუსეთში ჩვენმა ახლობლებმა აუხსნან ეს სხვებს. აქ იღუპება მშვიდობიანი მოსახლეობა, ბავშვები, ვეტერანები, რომლებმაც რუსეთთან ერთად ეს მიწები ფაშისტური გერმანიისგან დაიხსნეს“, - თქვა გაგარინმა.
პრეს-კონფერენციაზე იმყოფებოდა ათი სამხედრო, რომლებიც ტყვედ ნებაყოფლობით ჩაბარდნენ. თითოეულმა მათგანმა აღნიშნა, რომ კარგად ექცევიან და თავიანთ ახლობლებთან დარეკვის საშუალება მისცეს.
ტყვეების ნაწილმა განაცხადა, რომ აღარ სურთ რუსეთში დაბრუნება და ახლა თავიანთი ოჯახების გამო შიშობენ.
ამასთან, მათი თქმით, სამხედრო მოსამსახურეებმა სერჟანტების დონეზე, იცოდნენ, რომ მხოლოდ სამხედრო წვრთნებზე მიდოდნენ.
