რუსეთსა და უკრაინას შორის კონფლიქტის მოსალოდნელი ესკალაციის ფონზე, ევროკავშირი და აშშ ენერგეტიკული უსაფრთხოების სფეროში თანამშრომლობის გაღრმავებაზე შეთანხმდნენ. აღნიშნულთან დაკავშირებით განცხადება ევროკომისიის პრეზიდენტმა ურსულა ფონ დერ ლაიენმა და აშშ-ის პრეზიდენტმა ჯო ბაიდენმა გააკეთეს.
"აშშ და ევროკავშირი ერთად მუშაობენ, რათა უზრუნველყონ ევროკავშირისთვის ბუნებრივი გაზის მუდმივი, საკმარისი და დროული მიწოდება მსოფლიოს სხვადასხვა წყაროდან, რათა თავიდან აიცილონ შოკები, მათ შორის ის, რაც შეიძლება მოჰყვეს უკრაინაში რუსეთის ახალი შეჭრას", - ნათქვამია ამერიკელი და ევროპელი ლიდერების განცხადებაში, რომელსაც თეთრი სახლი და ევროკომისია ავრცელებენ.
დოკუმენტში ასევე აღნიშნულია, რომ აშშ უკვე არის ევროკავშირისთვის თხევადი ბუნებრივი აირის უდიდესი მიმწოდებელი და საჭიროების შემთხვევაში, ეს მიწოდება შეიძლება გაიზარდოს.
"ჩვენ ვაპირებთ მჭიდრო თანამშრომლობას ევროკავშირის ქვეყნებთან, რათა უზრუნველვყოთ თხევადი ბუნებრივი აირის მიწოდება სტაბილური მიწოდებისა და საგანგებო დაგეგმვის ინტერესებიდან გამომდინარე", - ნათქვამია განცხადებაში.
მანამდე, 26 იანვარს, ავსტრალიამ გამოაცხადა მზადყოფნა, გაზარდოს თხევადი გაზის მოცულობა ევროკავშირში, თუ რუსეთიდან ექსპორტი შემცირდება.
ევროპაში, რომელიც დიდწილად რუსეთის გაზზეა დამოკიდებული, გაჩნდა ეჭვი, რომ უკრაინაში რუსეთის შეჭრის საპასუხოდ დასავლეთის სანქციების შემდეგ, კრემლი ენერგორესურსების მიწოდებას შეზღუდავს.