შეერთებული შტატები უკრაინისთვის, მისი არმიის თავდაცვის შესაძლებლობების მხარდასაჭერად, Mi-17 კლასის სამხედრო-სატრანსპორტო ვერტმფრენების მიწოდებას გეგმავს. ამის შესახებ ბრიფინგზე თეთრი სახლის პრესმდივანმა ჯენ ფსაკიმ განაცხადა.
ფსაკის განცხადებით, პრეზიდენტის ადმინისტრაციამ ამ განზრახვის თაობაზე უკვე აცნობა კონგრესს.
"Excess Defense Articles პროგრამის ფარგლებში, ამერიკის არმიის მარაგებში არსებული Mi-17 კლასის სამხედრო-სატრანსპორტო ვერტმფრენების უკრაინისთვის მიწოდებას ვგეგმავთ. ამის შესახებ ახლახან ვაცნობეთ კონგრესს", - თქვა ფსაკიმ.
პრესმდივანმა აღნიშნა, რომ გასული წლის განმავლობაში, შეერთებულმა შტატებმა უკრაინას იმაზე მეტი დახმარება გაუწია, ვიდრე ოდესმე.
"მხოლოდ გასულ წელს ჩვენ უკრაინის უსაფრთხოებისთვის გამოვყავით 650 მილიონი დოლარი; ჯამში, 2014 წლის შემდეგ, ჩვენ უკრაინისათვის $2,7 მილიარდი გამოვყავით. უსაფრთხოების სფეროში არსებული ტრადიციული დახმარების გარდა, როგორიცაა უკრაინის უსაფრთხოების მხარდაჭერის ინიციატივა, პრეზიდენტმა ბრძანება გასცა უკრაინისთვის გადაუდებელი თავდაცვის საჭიროებების დაკმაყოფილებისა და ლეტალური იარაღის მიწოდების დაჩქარების შესახებ", - დასძინა ფსაკიმ.
რამდენიმე დღის წინ, გავრცელდა ცნობა, რომ ვაშინგტონი უკრაინისთვის Mi-17V5 და Mi-8MTV ვერტმფრენების მიწოდებას გეგმავდა, რომელიც მანამდე ავღანეთის საჰაერო ძალებს ემსახურებოდა.
შეგახსენებთ, 22 იანვარს უკრაინამ შეერთებული შტატებისგან ლეტალური იარაღი და საბრძოლო მასალები მიიღო.
მანამდე, უკრაინაში აშშ-ის სახელმწიფო მდივნის, ენტონი ბლინკენის ვიზიტის ფონზე, გავრცელდა ინფორმაცია, რომ ვაშინგტონი კიევს 200 მილიონი დოლარის ოდენობით დამატებით სამხედრო დახმარებას გაუწევს.