გავლენიანმა რესპუბლიკელმა სენატორმა, როჯერ ვიკერმა ტელეკომპანია CNN-თან, რუსეთისგან მომდინარე საფრთხეებზე და ვაშინგტონის მიერ გადადგმულ ნაბიჯებზე ისაუბრა.
სენატორის განცხადებით, პრეზიდენტმა ჯო ბაიდენმა შეცდომა დაუშვა, როდესაც უკრაინაში აშშ-ის ჯარების ცალმხრივი შეყვანა გამორიცხა.
"შეერთებული შტატები, ცხადია, მუდამ უნდა ისწრაფვოდეს დიპლომატიისკენ, მაგრამ ამავე დროს, სწორედ ახლაა იმის დრო, გამოავლინოს მზადყოფნა უკრაინისთვის შეიარაღების მიწოდების თაობაზე, რაც კიევს საშუალებას მისცემს, დაიცვას საკუთარი თავი", - თქვა სენატორმა.
როჯერ ვიკერმა განაცხადა, რომ სახელმწიფო მდივან ენტონი ბლინკენსა და რუსეთის საგარეო საქმეთა მინისტრ სერგეი ლავროვს შორის დიპლომატიური მოლაპარაკებები, შესაძლოა, რუსეთმა დროის გაყვანის მიზნით გამოიყენოს.
"აუცილებელია, ამას შევხედოთ რუსეთის წარსული ქმედებების კონტექსტში: 2014 წელს რუსეთმა დაიპყრო ყირიმი, შემდეგ შეიჭრა უკრაინის აღმოსავლეთ ნაწილში, მანამდე, 2008 წელს შეიჭრა საქართველოს ორ რეგიონში. რუსეთს განაგებს ადამიანი, რომელსაც სურს დაბრუნდეს "ბოროტების იმპერიაში", რაზედაც რონალდ რეიგანი საუბრობდა", - თქვა სენატორმა.
"და სანამ ჩვენ ვსაუბრობთ დეესკალაციაზე, ვხედავ რუსეთის შემდგომ ნაბიჯებს, რომელიც კიდევ მეტ ესკალაციას იწვევს: ელიტარული ჯარები გადაჰყავთ ბელარუსში, ძალიან ახლოს უკრაინის დედაქალაქთან, მაგრამ ასევე სახიფათოდ ახლოს პოლონეთთან, რომელიც ნატოს მოკავშირეა... ვფიქრობ, ახლა დროა, გავაგზავნოთ ჩვენი რამდენიმე ტანკი პოლონეთში, რათა შევძლოთ, დავიცვათ ჩვენი მოკავშირე", - დასძინა ვიკერმა.
სენატორმა როჯერ ვიკერმა ხაზგასმით აღნიშნა, რომ ვაშინგტონმა არავითარ შემთხვევაში არ უნდა მისცეს გარანტია კრემლს, რომ საქართველო და უკრაინა ნატო-ს წევრები არ გახდებიან.
"თუ გავითვალისწინებთ იმას, რომ უკრაინის საზღვართან 100 000 რუსი ჯარისკაცი იმყოფება და რუსეთის სამხედროები შეჰყავს ბელარუსში, გამოდის, პუტინი რაღაცას აპირებს. შესაძლოა, ეს იყოს უკრაინაზე მასიური თავდასხმის გეგმა, ან მზადება გადატრიალებისთვის [უკრაინაში]", - ამბობს სენატორი.
სენატორის განცხადებით, პუტინის პოლიტიკის დაგმობა აშშ-ის სენატის ორპარტიული პოზიციაა.
როჯერ ვიკერის განცხადებით, უკრაინელი ხალხი მძლავრ წინააღმდეგობას გაუწევს რუსეთს. "და ეს იქნება პუტინის შეცდომა, რომლის სინანულიც მას დიდხანს მოუწევს", - დასძინა სენატორმა.