უკრაინამ შეერთებული შტატების სამხედრო დახმარების პირველი პარტია მიიღო. იუწყება უკრაინაში ამერიკის საელჩო სოციალურ ქსელში.
"პრეზიდენტ ბაიდენის მიერ უკრაინის უსაფრთხოებისთვის დამტკიცებული დახმარების პაკეტის რამდენიმე ნაწილიდან პირველი უკვე კიევშია", – ნათქვამია საელჩოს განცხადებაში.
სამხედრო დახმარების ეს ნაწილი მოიცავს ლეტალურ იარაღს, საბრძოლო მასალის ჩათვლით.
"ეს დახმარება, ისევე როგორც 2014 წლიდან უკრაინისთვის გაწეული 2.7 მილიარდ დოლარზე მეტი დახმარება, ადასტურებს შეერთებული შტატების მტკიცე ერთგულებას უკრაინის თავდაცვის გაძლიერებისადმი, მზარდი რუსული აგრესიის ფონზე", - ნათქვამია განცხადებაში.
მანამდე, უკრაინაში აშშ-ის სახელმწიფო მდივნის, ენტონი ბლინკენის ვიზიტის ფონზე, გავრცელდა ინფორმაცია, რომ ვაშინგტონი კიევს 200 მილიონი დოლარის ოდენობით დამატებით სამხედრო დახმარებას გაუწევს.