უკრაინის საზღვრებთან რუსეთის სამხედრო ძალების გაძლიერების ფონზე, ესპანეთმა სამხედრო ხომალდები გაგზავნა ხმელთაშუა ზღვასა და შავ ზღვაში. ამის შესახებ სააგენტო Reuters-ის ცნობით, ესპანეთის თავდაცვის მინისტრმა, მარგარიტა რობლესმა განაცხადა.
რობლესის განცხადებით, ესპანეთის ფლოტის ხომალდი ნაღმტყორცნით უკვე დაიძრა, ხოლო ფრეგატი 3-4 დღეში გაცურავს.
მისივე თქმით, მადრიდი ასევე განიხილავს ბულგარეთში საბრძოლო თვითმფრინავების გაგზავნას.
"რუსეთი ვერცერთ ქვეყანას ვერ უკარნახებს, როგორ მოიქცეს. ნატო დაიცავს ნებისმიერი ქვეყნის სუვერენიტეტს, რომელსაც ძალუძს ან სურს ალიანსში გაწევრიანება“, - ციტირებს Reuters-ი თავდაცვის მინისტრს.
ამასთან, მარგარიტა რობლესი დასძენს, რომ მადრიდი კონფლიქტის მოგვარების დიპლომატიურ გზებს ანიჭებს უპირატესობას.
ესპანეთმა გადაწყვიტა წვლილი შეიტანოს აღმოსავლეთ ევროპაში ნატოს სამხედრო წარმომადგენლობაში მას შემდეგ, რაც საგარეო საქმეთა მინისტრმა ხოსე მანუელ ალბარესმა და აშშ-ს სახელმწიფო მდივანმა ენტონი ბლინკენმა სამშაბათს ვაშინგტონში განიხილეს კოორდინირებული პასუხი უკრაინის მიმართ რუსეთის მუქარაზე.