შეერთებულ შტატებში ფიქრობენ, რომ რუსეთი ნებისმიერ მომენტში, შესაძლოა, უკრაინას თავს დაესხას. ამის შესახებ თეთრი სახლის პრესმდივანმა ჯენ ფსაკიმ განაცხადა.
"ვფიქრობთ, რომ უკიდურესად სახიფათო ვითარებაა შექმნილი. ჩვენ ვიმყოფებით იმ ეტაპზე, როდესაც რუსეთი ნებისმიერ მომენტში, შესაძლოა უკრაინას თავს დაესხას", - განაცხადა ფსაკიმ ყოველდღიურ ბრიფინგზე.
ჯენ ფსაკიმ თქვა, რომ კრიზისი, უკრაინის საზღვრებთან ათასობით სამხედროს განლაგებით, რუსეთის პრეზიდენტმა ვლადიმირ პუტინმა შექმნა
პრესმდივნის განცხადებით, ახლა რუსეთის გადასაწყეტია, თუ რომელ გზას დაადგება.
"შედეგები იქნება მძიმე, თუ რუსეთი დიპლომატიურ გზას არ აირჩევს", - დასძინა ფსაკიმ.
შეგახსენებთ, ცოტა ხნის წინ, აშშ-ის სახელმწიფო მდივანმა, ენტონი ბლინკენმა და რუსეთის საგარეო საქმეთა მინისტრმა, სერგეი ლავროვმა, სატელეფონო საუბრისას, უკრაინა-რუსეთის საზღვარზე არსებული ვითარება და ევროპის უსაფრთხოების საკითხები განიხილეს.
ენტონი ბლინკენმა უკრაინის სუვერენიტეტისა და ტერიტორიული მთლიანობის მიმართ მხარდაჭერა კიდევ ერთხელ დაადასტურა და ხაზი გაუსვა დიპლომატიური გზის გაგრძელების მნიშვნელობას.
"სახელმწიფო მდივანმა ბლინკენმა ხაზი გაუსვა დიპლომატიური გზის გაგრძელების მნიშვნელობას უკრაინაში და მის მახლობლად რუსული სამხედრო ძალების ღრმად შემაშფოთებელი დაძაბულობის დეესკალაციისთვის. ბლინკენმა კიდევ ერთხელ დაადასტურა აშშ-ის ურყევი ერთგულება უკრაინის სუვერენიტეტისა და ტერიტორიული მთლიანობის მიმართ და ხაზგასმით აღნიშნა, რომ ევროპის უსაფრთხოების შესახებ ნებისმიერი განხილვა უნდა მოიცავდეს ნატო-ს მოკავშირეებს, ევროპელ პარტნიორებს, მათ შორის უკრაინას", - აღნიშნულია აშშ-ის სახელმწიფო დეპარტამენტის განცხადებაში.
