ირანსა და კიდევ 7 ქვეყანას გაეროს ბიუჯეტში ყოველწლიური კონტრიბუციის გადაუხდელობის გამო გენერალურ ასამბლეაზე ხმის მიცემის უფლება შეუჩერდათ. ამის შესახებ ნათქვამია გაეროს გენერალური მდივნის, ანტიონიო გუტერეშის გენერალური ასამბლეის პრეზიდენტის აბდულა შაჰიდისადმი წარგზავნილ წერილში.
გაეროს ბიუჯეტის მიმართ დავალიანება ასევე აქვთ ვენესუელას, სუდანს, ანტიგუა და ბარბუდას, კონგოს რესპუბლიკას, გვინეას, პაპუა-ახალი გვინეასა და ვანუატუს.
გაეროში ირანის მუდმივი წარმომადგენლის, მაჯიდ ტახტ რავანჩის განცხადებით, ირანის ისლამური რესუბლიკა ყოველთვის მზად იყო დროულად გადაეხადა ორგანიზაციის საწევრო და ამის უამრავი მაგალითი არსებობს.
მისივე თქმით, თეირანი ეძებს გზებს, რათა გამონახოს "უსაფრთხო არხი" დავალიანების დასაფარად.
"სამწუხაროა, რომ მეორე წელია, ვაწყდებით დაბრკოლებებს გადახდების განხორციელებისას და ეს გამოწვეულია აშშ-ის სასტიკი სანქციებით. თანხა გვაქვს ჩვენს საზღვარგარეთულ ანგარიშებზე, მაგრამ არ არის ხელმისაწვდომი", - თქვა ირანელმა დიპლომატმა.
მინიმალური თანხა, რომელიც ირანმა უნდა გადაიხადოს თავისი უფლებების აღსადგენად, დაახლოებით, 18 მილიონი დოლარია.
გაეროს წესდების თანახმად, თუ წევრი ქვეყნის დავალიანება უდრის ან აღემატება გადასახადის ოდენობას, რომელიც უნდა გადაეხადა წინა ორი წლის განმავლობაში, მისი ხმის უფლება შეჩერებულია გადახდის დასრულებამდე.
მსგავსი გამოწვევის წინაშე, ირანი გასულ წელსაც აღმოჩნდა. თვეების განმავლობაში მოლაპარაკებების შემდეგ, აშშ-ის ხაზინამ საბოლოოდ დაუშვა წვდომა ირანის მილიარდობით დოლარის მცირე ნაწილზე. ამან საშუალება მისცა თეირანს, მინიმალური კონტრიბუციის შეტანით, აღედგინა შეჩერებული ხმის უფლება.
ირანის წინააღმდეგ შეერთებული შტატების სანქციები 2018 წლიდან მოქმედებს. სანქციების განახლება გამოიწვია 2015 წელს გაფორმებული ბირთვული შეთანხმებიდან აშშ-ის გასვლამ.
2015 წელს ირანმა და საერთაშორისო "ექვსეულმა" (რუსეთი, აშშ, საფრანგეთი, გერმანია, დიდი ბრიტანეთი და ჩინეთი) მიაღწიეს ყოვლისმომცველ მოქმედების გეგმას. გარიგება ითვალისწინებდა თეირანის წინააღმდეგ სანქციების მოხსნას ირანის ბირთვული პროგრამის შეზღუდვის საპასუხოდ.
თუმცა 2018 წელს დონალდ ტრამპმა განაცხადა, რომ აშშ-ი შეთანხმებას ტოვებდა და ირანის წინააღმდეგ მკაცრ სანქციებს აწესებდა.