საქართველოს მესამე პრეზიდენტმა, მიხეილ სააკაშვილმა, რომელიც რუსთავის მე-12 პენიტენციურ დაწესებულებაში იმყოფება, ხელისუფლების მიმართ წაყენებული ულტიმატუმის ვადა იანვრის ბოლომდე გაახანგრძლივა. ამის შესახებ სააკაშვილის ადვოკატი შოთა თუთბერიძე იუწყება.
მიხეილ სააკაშვილის ულტიმატუმის ვადა დღეს, 6 იანვარს იწურებოდა. ადვოკატის განცხადებით, პატიმარს ისევ შეზღუდული აქვს სამედიცინო მომსახურების უფლება და, ასევე, ადვოკატებთან შეხვედრის დროს, არსებობს გარკვეული ბარიერები.
მოთხოვნების დაუკმაყოფილებლობის შემთხვევაში, მიხეილ სააკაშვილი პროტესტის უკიდურეს ფორმებს მიმართავს.
"არ მახსოვს არც ერთი შეუსრულებელი ულტიმატუმი ან დარღვეული მიხეილ სააკაშვილის მხრიდან, არც ერთი მისი დაპირება არ მახსოვს შეუსრულებელი, განსხვავებით იმ ადამიანებისგან, რომლებიც ყოველდღე ტყუილს იძახიან იუსტიციის სამინისტროს შენობიდან, განსხვავებით იმ ადამიანებისგან, რომლებიც სასახლეებში ჩაკეტილები ჭორაობენ მიხეილ სააკაშვილზე და გაურბიან მასზე ობიექტურ გამოძიებას, ობიექტური სასამართლოს ჩატარებას. რაც შეეხება სერიოზულობას, დარწმუნებული ვარ, ქართველი ხალხი ძალიან სერიოზულად აღიქვამს მიხეილ სააკაშვილის თითოეულ განცხადებას, თითოეულ მოსაზრებას, რადგან სამწუხაროდ, ეს არის ადამიანი, რომლის მმართველობის დროსაც საწვავის ფასი და დენის ფასი იყო სამჯერ უფრო ნაკლები, ვიდრე ახლა არის და ინფლაცია იყო ექვსჯერ უფრო ნაკლები, ვიდრე ახლა არის. სერიოზულად აღქმის პრობლემა თუ აქვს დღეს ვინმეს, მე მგონი, ეს არის ამჟამინდელი ხელისუფლება და არა მიხეილ სააკაშვილი, მისი ულიმატუმები და ყველა მისი პირობა, ამ ეტაპისთვის შესრულებულია", - განაცხადა თუთბერიძემ.
