"ომიკრონით" დაავადებული ადამიანების ჰოსპიტალიზაციის რისკი, "დელტათი" ინფიცირებულებთან შედარებით, 70%-ით ნაკლებია, - ამის შესახებ დიდ ბრიტანეთში ჩატარებული კვლევის დასკვნაშია ნათქვამი. ამასთან, ბევრად დაბალია შანსი, რომ ჰოსპიტალიზებული პაციენტები დამძიმდნენ.
გაერთიანებული სამეფოს ჯანდაცვის უსაფრთხოების სააგენტოს (UKHSA) მიერ გამოქვეყნებულ კვლევაში ნათქვამია, რომ მონაცემები წინასწარია და ჯერჯერობით, ზუსტ სურათს არ ასახავს, რადგან ახალი შტამით ინფიცირებული პაციენტების რაოდენობა კლინიკებში, ჯერჯერობით, დაბალია, ასევე, ვარიანტი ფართოდ ჯერ არ გავრცელებულა ასაკოვან ადამიანებს შორის.
UKHSA-ს კვლევაში ნათქვამია ისიც, რომ "ომიკრონის" სიმპტომების წინააღმდეგ, ვაქცინის მეორე დოზის შემდეგ, დაცვა იკლებს, თუმცა "ბუსტერდოზა" იმუნიტეტს საგრძნობლად აუმჯობესებს.
მონაცემებს იმედისმომცემად აფასებს ბრიტანეთის ჯანდაცვის მდივანი - საჯიდ ჯავიდი, მისი თქმით, მონაცემებს საათობრივად დააკვირდებიან.
