შინაგან საქმეთა სამინისტროს საგანგებო სიტუაციების მართვის სამსახურის განსაკუთრებულ სიტუაციებზე რეაგირების მთავარი სამმართველოს ბაზაზე არსებული ინფრასტრუქტურის მოსანახულებლად და მეხანძრე-მაშველებთან შესახვედრად, სტუმრად პოლონეთის სახელმწიფო სახანძრო სამსახურის დელეგაცია იმყოფებოდა. პოლონელ სტუმრებს ბაზაზე სამსახურის სახანძრო-სამაშველო ძალების დეპარტამენტის თანამშრომლებმა უმასპინძლეს და ადგილზე მომუშავე ჯგუფების შესაძლებლობები დეტალურად გააცნეს.
განსაკუთრებულ სიტუაციებზე რეაგირების მთავარი სამმართველოს ბაზაზე ვიზიტის შემდეგ, დელეგაციის წარმომადგენლებს სამსახურის უფროსის მოადგილე - ლევან ღირსიაშვილი შეხვდა. შეხვედრისას საუბარი შეეხო საგანგებო სიტუაციების მართვის სამსახურის მიერ განხორციელებულ პროექტებს და მხარეებს შორის არსებული თანამშრომლობის გაფართოების პერსპექტივებს. პოლონეთის სახელმწიფო სახანძრო სამსახურის ოპერატიული მართვის დეპარტამენტის დირექტორთან - იაცეკ ზალეჩთან შეხვედრას, ასევე, ესწრებოდნენ სამსახურის სახანძრო-სამაშველო ძალების დეპარტამენტის უფროსი - დავით სუხიშვილი და კოორდინაციის სამმართველოს უფროსი – გიორგი გერგაული.
დელეგაციის ვიზიტი პოლონეთის რესპუბლიკის საგარეო საქმეთა სამინისტროს პოლონეთის განვითარების თანამშრომლობის პროექტის „საქართველოში კრიზისების მართვის ფარგლებში სამაშველო დანაყოფების ქსელის ანალიზი და განვითარება“ ფარგლებში განხორციელდა. პოლონეთის სახელმწიფო სახანძრო სამსახურთან თანამშრომლობა მოიცავს როგორც მატერიალურ-ტექნიკური ბაზის განვითარებას და ქართველი მეხანძრე-მაშველებისთვის საგანმანათლებლო ღონისძიებების ჩატარებას, ასევე, სამსახურის სამაშველო დანაყოფების ქსელის ანალიზსა და განვითარებას. დელეგაცია ერთი კვირის განმავლობაში კახეთის, სამცხე-ჯავახეთის, შიდა ქართლისა და ქვემო ქართლის რეგიონებს ეწვევა და საქართველოს რეგიონებში სახანძრო-სამაშველო განყოფილებებში არსებულ სიტუაციას ადგილზე შეისწავლის.
