ევროკავშირი საქართველოს, მოლდოვასა და უკრაინას თავდაცვისუნარიანობის გაძლიერებაში დაეხმარება. ამის შესახებ ნათქვამია ევროპული საბჭოს მიერ მიღებულ გადაწყვეტილებაში.
ჯამში ევროკავშირი აღმოსავლეთ პარტნიორობის ქვეყნების თავდაცვისუნარიანობის გაძლიერებისთვის 50 მილიონ ევროს გამოყოფს.
ევროპული საბჭოს ინფორმაციით, ფულადი სახსრები "შიდა სტაბილურობისა და მშვიდობის" მხარდასაჭერად მშვიდობის ევროპული ფონდის (EPF) ფარგლებში იქნება გამოყოფილი.
ამასთან, აღნიშნულია, რომ დახმარება არ ითვალისწინებს გამანადგურებელი საბრძოლო აღჭურვილობის მიწოდებას.
საქართველო სამი წლის განმავლობაში 12,75 მილიონ ევროს, მოლდოვა - 7 მილიონ ევროს, უკრაინა კი 31 მილიონ ევროს მიიღებს.
"გამოყოფილი თანხა დაეხმარება საქართველოს თავდაცვის ძალების პოტენციალის გაძლიერებაში, მათ შორის კრიზისულ და საგანგებო სიტუაციებში მოსახლეობის დახმარების მხრივ. კერძოდ, საუბარია არალეტალურ სამედიცინო და საინჟინრო მოწყობილობებზე და სამოქალაქო დანიშნულების გადაადგილების საშუალებებზე", - აღნიშნულია განცხადებაში.
