რუსეთის ფედერაცია დაჟინებით მოითხოვს, რომ ნატო-მ ხელი აიღოს აღმოსავლეთით გაფართოებაზე, - ამის შესახებ "რია ნოვოსტის" ცნობით, რუსეთის პრეზიდენტმა ვლადიმირ პუტინმა კრემლში ელჩებისთვის რწმუნებათა სიგელების გადაცემის ცერემონიაზე განაცხადა.
პუტინის თქმით, რუსეთს სურს მიიღოს სამართლებრივი გარანტიები, რათა დარწმუნდეს, რომ ნატო შეწყვეტს გაფართოებას მისი საზღვრების მიმართულებით.
"საგარეო საქმეთა სამინისტროში საუბრისას, მე უკვე ხაზგასმით აღვნიშნე, რომ ჩვენი დიპლომატიის წინაშე დგას უპირველესი ამოცანა, რათა რუსეთმა მიიღოს საიმედო და გრძელვადიანი უსაფრთხოების გარანტიები.
აშშ-სა და მათ მოკავშირეებთან დიალოგში ჩვენ დაჟინებით მოვითხოვთ კონკრეტული შეთანხმებების შემუშავებას, რომლებიც გამორიცხავს აღმოსავლეთით ნატო-ს ნებისმიერ მომდევნო გაფართოებას და რუსეთის ტერიტორიის უშუალო სიახლოვეს ჩვენთვის საფრთხის შემცველი შეიარაღების სისტემების განთავსებას", - თქვა პუტინმა.