თურქმენეთის საბავშვო ბაღებში რუსულ ენაზე მულტფილმების ჩვენება აიკრძალა. ამის შესახებ "რადიო თავისუფლების" თურქმენული სამსახური იტყობინება.
როგორც იუწყებიან, თურქმენეთის დედაქალაქ აშხაბადის საგანმანათლებლო დაწესებულებებში განათლების სამინისტროს ინსპექტორებმა შემოწმება ჩაატარეს.
შემოწმების შედეგად გამოირკვა, რომ ორ საბავშვო ბაღში აღმზრდელებმა ბავშვებს მულტფილმები რუსულ ენაზე აჩვენეს. ეს აღმზრდელები სამსახურიდან გაათავისუფლეს, მენეჯერებს კი სასტიკი საყვედური გამოუცხადეს.
აშხაბადელმა ინსპექტორებმა მკაცრად გააფრთხილეს საბავშვო ბაღების ადმინისტრაცია, რომ ამიერიდან ბავშვებს მულტფილმები მხოლოდ თურქმენულ ენაზე უნდა აჩვენონონ.
გარდა ამისა, ინსპექტორებმა საბავშვო ბაღებში აკრძალეს რვეულების გამოყენება, სადაც სიტყვა "რვეული" რუსულ ენაზე წერია, ასევე, აიკრძალა ილუსტრირებული ალბომები, რომელზეც გამოსახულია უცხო ქვეყნის ლიტერატურული და კინოგმირები.
გარდა ამისა, მატარებლის სადგურებსა და აეროპორტებში, ასევე სატრანსპორტო საშუალებებში აიკრძალა რუსულენოვანი განცხადებებისა და ინსტრუქციების გამოქვეყნება.
თურქმენეთის საგანმანათლებლო დაწესებულებებში რუსული ენის აკრძალვა ჯერ კიდევ 2020 წელს დაწესდა და ქვეყნის მასშტაბით საშუალო სკოლებში რუსული კლასების უმეტესობა დაიხურა.
თურქმენეთში 1990-იანი წლების დასაწყისში მიიღეს კანონი თურქმენული ენის შესახებ, რომელსაც მიენიჭა სახელმწიფო ენის სტატუსი. ამის შემდეგ, 90-იანი წლების შუა ხანებში, თურქმენული ენა ლათინურ ანბანზე გადავიდა.
დღეს თურქმენეთში მხოლოდ ერთი სრულად რუსულენოვანი სკოლაა, ასევე რამდენიმე სკოლა რუსულენოვანი კლასებით.
გარდა ამისა, დამოუკიდებლობის წლებში დაიხურა სკოლები სხვა ეროვნული უმცირესობების ენებზე, მაგალითად, უზბეკური და ყაზახური სკოლები.
თურქმენეთის ხელისუფლება არ განმარტავს საბავშვო ბაღებში რუსულ ენაზე მულტფილმების ჩვენების აკრძალვის მიზეზებს.