ამსტერდამის სააპელაციო სასამართლოს გადაწყვეტილებით, სკვითების ოქროს ექსპონატები ყირიმის მუზეუმებიდან კიევს უნდა გადაეცეს.
ყირიმის მუზეუმებიდან სკვითების ოქროს რამდენიმე ასეული არტეფაქტი ნიდერლანდებში გამოფენისთვის ჯერ კიდევ 2014 წლის თებერვალში, რუსეთის მიერ ნახევარკუნძულის ანექსიამდე გაიგზავნა.
გამოფენის დასასრულისთვის, ყირიმზე კონტროლს რუსეთი ახორციელებდა, შესაბამისად, ექსპონატების დაბრუნების საკითხი დავის საგანი გახდა კიევსა და მოსკოვს შორის.
2016 წლის დეკემბერში ამსტერდამის პირველი ინსტანციის სასამართლომ მხარი დაუჭირა უკრაინის მხარის მოთხოვნას და უარი თქვა ექსპონატების ანექსირებულ ყირიმში დაბრუნებაზე. სასამართლოს ეს გადაწყვეტილება 2017 წელს რუსეთმა გაასაჩივრა.
რუსეთის კულტურის სამინისტრო მაშინ იუწყებოდა, რომ თუ ამსტერდამის სასამართლო მათ სარჩელს უკუაგდებდა, რუსეთი თავის მუზუმებში არსებულ ექსპონატებს ნიდერლანდებში საგამოფენოდ არასდროს გაგზავნიდა.
ამსტერდამის სააპელაციო სასამართლოს გადაწყვეტილებას მიესალმა და "დიდი ხნის ნანატრი" გამარჯვება უწოდა უკრაინის პრეზიდენტმა ვოლოდიმირ ზელენსკიმ.
პრეზიდენტმა მადლობა გადაუხადა სასამართლოს სამართლიანი გადაწყვეტილების გამო.
"ჩვენ ყოველთვის ვიბრუნებთ ჩვენსას. ჯერ სკვითურ ოქროს დავაბრუნებთ, შემდეგ კი ყირიმს", - თქვა ვოლოდიმირ ზელენსკიმ.
რუსეთის მხარე ამსტერდამის სააპელაციო სასამართლოს გადაწყვეტილებას პოლიტიზირებულად მიიჩნევს და ნიდერლანდების უზენაეს სასამართლოში გასაჩივრებას გეგმავს.