ჰოლივუდის მსახიობმა ალეკ ბოლდუინმა პირველი კომენტარი გააკეთა მას შემდეგ, რაც მის მიერ ფილმის გადასაღებ მოედანზე გასროლილ ტყვიას შემთხვევით ოპერატორი ემსხვერპლა.
ალეკ ბოლდუინის განცხადებით, ის ჯერ კიდევ შოკირებული და უაღრესად დამწუხრებულია მოხდარის გამო. მისი თქმით, ის დაუკავშირდა გარდაცვლილი ოპერატორის ჰალინა ჰატჩინის მეუღლესა და შვილს და ყოველმხრივ დახმარება აღუთქვა.
"სიტყვები არ მყოფნის იმის გადმოსაცემად, თუ რამდენად შოკირებული და დამწუხრებული ვარ იმ ტრაგიკული შემთხვევის გამო, რომელსაც ჩვენი შესანიშნავი კოლეგის სიცოცხლე ემსხვერპლა", - თქვა ბოლდუინმა.
მისივე თქმით, ის სრულად თანამშრომლობს პოლიციასთან, რათა გაირკვეს ტრაგიკული შემთხვევის მიზეზები.
შეგახსენებთ, ალეკ ბოლდუინის გასროლილმა ტყვიამ ფილმის გადასაღებ მოედანზე შემთხვევით ოპერატორი, 42 წლის ჰალინა ჰატჩინი იმსხვერპლა, რეჟისორი კი დაჭრა. მისი მდგომარეობა კრიტიკულია.გადაღებები ნიუ-მექსიკოს შტატში, ქალაქ სანტა-ფესთან მიმდინარეობდა.
ინციდენტი იმ სცენის გადაღების დროს მოხდა, სადაც ბოლდუინს ფუჭი ტყვიებით უნდა ესროლა. იარაღი გადასაღებ მოედანზე რეკვიზიტად იყო გამოყენებული. როგორ აღმოჩნდა იარაღში ნამდვილი ტყვიები, გაურკვეველია.
ოპერატორი ქალი კლინიკაში ვერტმფრენით გადაიყვანეს, თუმცა მისი გადარჩენა ვერ მოხერხდა. 48 წლის რეჟისორ ჯოელ სოუსას მდგომარეობა კი ამ დრომდე მძიმეა.