შინაგან საქმეთა მინისტრის, ვახტანგ გომელაურის განცხადებით, ბათუმში, საცხოვრებელი კორპუსის ნანგრევებიდან 2 ადამიანია ამოყვანილი და ისინი სამედიცინო დაწესებულებაში არიან გადაყვანილი.
შინაგან საქმეთა მინისტრის თქმით, ნანგრევებში მოყოლილია დაახლოებით 10 მოქალაქე.
აღნიშნული კომენტარი ვახტანგ გომელაურმა ბათუმში, მედიასთან გააკეთა.
"გიდასტურებთ, ორი ადამიანია, ორივე ცოცხალი იქნა ამოყვანილი, მძიმე მდგომარეობაში, თუმცა ცოცხალია, კონტაქტურები არიან ორივე, ორივე გადაყვანილი არიან საავადმყოფოში, სავარაუდოდ, კიდევ ერთი - მესამე ადამიანის ცხედარია ნანახი, დამიზუსტებენ ახლა. ჩვენი ვარაუდით, დაახლოებით 7-8 კაცი, 10 კაცზე მეტი არ უნდა იყოს შიგნით. ვმუშაობთ მთელი ღამე და გაგრძელდება მუშაობა თუნდაც ხვალამდე, სანამ არ დასრულდება და ბოლომდე არ მივიყვანთ სამუშაოებს.
ძალიან დიდი მასაა და ფრთხილად მუშაობენ, იქიდან გამომდინარე, რომ გადარჩენილი ადამიანი ჩვენ არ დავაზიანოთ. მძიმე სამუშაოა, კიდევ ხაზს ვუსვამ, იქედან გამომდინარე, რომ ორ კორპუსს შუა დგას ეს ჩამონგრეული კორპუსი. ორივე მხრიდან მუშაობენ, ხედავთ, რომ აქტიურად მუშაობენ, როგორც ტექნიკა, ასევე, ტრაქტორები. ყველაფერს ვაკეთებთ, რომ, რაც შეიძლება სწრაფად მოხდეს ამ ყველაფრის - ამ ბეტონების და ე.წ. სინკარების გადმოლაგება, რომ ადამიანი, თუ ცოცხალი გადარჩა, სწრაფად ვუშველოთ, გადავიყვანოთ საავადმყოფოში.
რაც შეეხება ბავშვებს, ინფორმაციით, უნდა იყოს 2 ან 3 ბავშვი, როგორც მეზობლები გვეუბნებიან, ოღონდ ჯერ ვერაფერს ვერ გიდასტურებთ. ორი ადამიანი იქნა ამოყვანილი, მძიმედ არიან, მაგრამ ცოცხლები, კონტაქტური და გადაყვანილი არიან საავადმყოფოში. როგორც მომახსენეს ახლა მაშველებმა, ერთი ადამიანის ცხედარი უნდა იყოს ნანახი, ვერ გიდასტურებთ 100 პროცენტით. რასაც ახლა ვაზუსტებ, დაახლოებით 10 კაცზე მეტი არ უნდა იყოს მოყოლილი", - განაცხადა ვახტანგ გომელაურმა.
ტერიტორიის ნანგრევებისგან გაწმენდა და აქტიური საძიებო-სამაშველო ღონისძიებები უწყვეტ რეჟიმში გრძელდება.
