აშშ-ის ცენტრალური სარდლობის (CENTCOM) მეთაურმა, გენერალმა ფრენკ მაკენზიმ პარასკევს აღიარა, რომ 29 აგვისტოს ქაბულში მანქანაზე დრონით განხორციელებული იერიში ტრაგიკული შეცდომა იყო და ბოდიში მოიხადა მშვიდობიანი მოქალაქეების დაღუპვისთვის.
"10 მშვიდობიანი მოქალაქე, მათ შორის 7 ბავშვი, ტრაგიკულად დაიღუპა საჰაერო იერიშის დროს", - განაცხადა მაკენზიმ გამოძიების შედეგებზე საუბრისას.
მისივე თქმით, ახლა უკვე შეიძლება ითქვას, რომ ადამიანებს, რომლებიც ტრაგიკულად დაიღუპნენ, არ ჰქონდათ კავშირი ტერორისტულ ორგანიზაცია "ისლამურ სახელმწიფოსთან", როგორც ამას დაზვერვის მონაცემები იუწყებოდა.
"როგორც სამხედრო ლიდერი, რომელიც მეთვალყურეობდა ოპერაციას, ვიღებ სრულ პასუხისმგებლობას დარტყმასა და ამ ტრაგიკულ შედეგებზე", - თქვა მაკენზიმ.
გენერალმა ასევე აღნიშნა, რომ შეერთებული შტატები მუშაობს ტრაგიკულად დაღუპულთა ნათესავებისთვის კომპენსაციის გადახდაზე.
სამხედროების მიერ დაშვებული შეცდომის გამო, სინანული გამოხატა თავდაცვის მდივანმა ლოიდ ოსტინმა.
"გამოძიებამ აჩვენა, რომ დარტყმა, რომელიც ითვლებოდა, რომ მიზნად ისახავდა ჰამიდ კარზაის საერთაშორისო აეროპორტთან საფრთხის აღმოფხვრას, რეალურად გამოიწვია 10-მდე ადამიანის დაღუპვა, მათ შორის შვიდი ბავშვის", - ამბობს ლოიდ ოსტინი.
"ჩვენ ბოდიშს ვიხდით და ყველაფერს გავაკეთებთ იმისათვის, რომ სწორი დასკვნები გამოვიტანოთ ამ საშინელი შეცდომისგან", - დასძინა ოსტინმა.
შეგახსენებთ, აშშ-მა დრონებით დარტყმა ქაბულის აეროპორტთან მომხდარი ტერაქტიდან სამ დღეში განახორციელა. თავდასხმის შედეგად ათი ავღანელი დაიღუპა, მათ შორის ბავშვები.
