ექსპერტი ეკონომიკის საკითხებში დავით ნარმანია გამორიცხავს გავრცელებულ ინფორმაცის, იძულებით გადაადგილებულ პირთათვის ბინების დაკანონების შემდეგ, უძრავი ქონების ბაზარზე ფასების კლების შესახებ.
"დევნილებისათვის დაკანონებული სახლები არის ძალიან მცირე ნაწილი იმ სახლებისა, რაც უძრავი ქონების ბაზარზე იყიდება. ეს არის დაახლოებით 2-3 % მთლიან მასაში. ჩემი აზრით, დევნილებისათვის ფართების დაკანონება და 1-ელი დეკემბრიდან საკუთრების გაყიდვის შემთხვევაში მათი მოგების გადასახადებისაგან განთავისუფლება, უძრავი ქონების ფასებთან დაკავშირებით საერთო სურათს არ შეცვლის და ბინებს არ გააიფებს", _ აცხადებს "ჯი-ეიჩ-ენთან" საუბარში დავით ნარმანია.
ექსპერტის აზრით, ხელისუფლების ქმედებებს სოციალური დატვირთვა უფრო აქვს, ვიდრე ეკონომიკური.
"დევნილებს ეს ქონება თავს დროზე ნაყიდი არ აქვს და სახელმწიფომ ის მათ რაცაღეების სანაცვლოდ, საკომპენსაციოდ მისცა. როდესაც დევნილი ასეთ ქონებას ყიდის, რეალიზაციისას ის ფაქტობრივად მოგებას ვერ ნახულობს, რადგანაც ეს შემოსავალი მისთვის არის გარკვეული სარგებელი, კომპენსაცია. მიმაჩნია, რომ რადგანაც დევნილმა ეს უძრავი ქონება კომპენსაციის სახით მიიღო, მიზანშეწონილიც არ იყო, რომ დაბეგრილიყო", _ აცხადებს დავით ნარმანია.
შეგახსენებთ, რომ აფხაზეთიდან იძულებით გადაადგილებულმა პირებმა სახელმწიფო ბინები სიმბოლურ ფასად, 1 ლარად მიიღეს.
აღსანიშნავია ისიც, რომ თუკი ახლა დევნილებს ბინების გაყიდვის შემთხვევაში სახელწიფო ბიუჯეტის სასარგებლოდ მოგების გადასახადის გადახდა უწევთ, 1-ელი დეკემბრიდან ისინი ამ გადასახადისგან თავისუფლდებიან.
შესაბამისი კანონპროექტის ინიცირება პარლამენტში გასულ კვირას მოხდა და მას საკანონმდებლო ორგანო უახლოეს დღეებში დაამტკიცებს.
აღსანიშნავია ისიც, რომ უძრავი ქონების ბაზარი საქართველოში მზარდი სეგმენტია.
2010 წლის ოქტომბერში უძრავი ქონების ბაზარზე სარეგისტრაციო ტრანსაქციათა რაოდენობა წინა თვესთან შედარებით 4.5%-ით გაიზარდა და ქვეყნის მასშტაბით 33 110 ერთეული შეადგინა.
საჯარო რეესტრის ეროვნული სააგენტოს ინფორმაციით, უძრავი ქონების სარეგისტრაციო ტრანსაქციების რაოდენობას ზრდა წინა წლის იმავე თვესთან შედარებით ცალსახად ზრდის ტენდენცია ახასიათებს: იანვრის თვეში - 32.2%-ით, თებერვლის თვეში - 11.7%-ით, მარტის თვეში - 35.8%-ით, აპრილის თვეში - 40.1%-ით, მაისის თვეში - 52.8%-ით, ივნისის თვეში - 30.9%-ით, ივლისის თვეში - 16.8%-ით, აგვისტოს თვეში - 13.3%-ით, სექტემბრის თვეში - 5.6%-ით, ოქტომბრის თვეში - 4.5%-ით.
2010 წლის 10 თვის განმავლობაში განხორციელებული ტრანსაქციების რაოდენობა წინა წლის იმავე პერიოდის ინდიკატორს 22.4%-ით აღემატება და შეადგენს 325 456 ერთეულს (საშუალოდ თვეში 32 546 ერთეული), რაც მხოლოდ 7 259 ერთეულით ჩამორჩება 2009 წლის 12 თვის ინდიკატორს.
ოქტომბრის თვეში სარეგისტრაციო ტრანსაქციების თვის ინდექსიც გაიზარდა და 1.068 დონეზე დაფიქსირდა, რაც წინა წლის იმავე თვის ინდექსს (1.022) აღემატება. აშკარაა, რომ უძრავი ქონების პირველადი და მეორადი ბაზრები წინა თვესთან შედარებით შემცირდა (შესაბამისად 5.4%-ით და 5.3%-ით), ხოლო წინა წლის იმავე თვესთან შედარებით გაიზარდა (შესაბამისად 2.4%-ით და 5.0%-ით).
2010 წლის ოქტომბრის თვეში პირველადი სარეგისტრაციო ტრანსაქციების რაოდენობამ - 6 113, ხოლო მეორადი სარეგისტრაციო ტრანსაქციების რაოდენობამ - 26 997 ერთეული შეადგინა; სარეგისტრაციო ტრანსაქციების თვის ინდექსი კი პირველადი და მეორადი სარეგისტრაციო ტრანსაქციების მიხედვით შესაბამისად 0.657 და 1.243 დონეებზე დაფიქსირდა.
რაც შეეხება პირველად და მეორად სარეგისტრაციო ტრანსაქციებს შორის თანაფარდობას, უმნიშვნელოდ გაიზარდა მეორადი სარეგისტრაციო ტრანსაქციების წილი: ოქტომბერში განხორციელებული სარეგისტრაციო ტრანზაქციების 81.5%-ს მეორადი, ხოლო 18.5%-ს - პირველადი სარეგისტრაციო ტრანსაქციები შეადგენდნენ (2009 წლის ოქტომბერში კი - შესაბამისად 81.2% და 18.8%).