16 ივნისს ჟენევაში გამართული სამიტის ფარგლებში შეერთებული შტატებისა და რუსეთის პრეზიდენტებმა საჩუქრები გაცვალეს.
თეთრი სახლის მიერ გავრცელებული ინფორმაციით, ჯო ბაიდენმა ვლადიმირ პუტინს ბროლის ბიზონის ქანდაკება და მზის სათვალე "ავიატორი" უსახსოვრა.
ამერიკის პრეზიდენტის ადმინისტრაციის მიერ გავრცელებული ცნობით, "ბიზონი ერთ-ერთი ყველაზე დიდებული ცხოველია შეერთებულ შტატებში და ძლიერებას, ერთიანობასა და სიმტკიცეს განასახიერებს“.
ბროლის ბიზონის ქანდაკება დამაგრებულია ალუბლის ხისგან დამზადებულ კვარცხლბეკზე, რომელზეც ამოტვიფრულია წარწერა "პრეზიდენტ ბაიდენისა და პრეზიდენტ პუტინის შეხვედრის პატივსაცემად".
თეთრი სახლის ცნობითვე, "ავიატორის" სათვალე საგანგებოდ დაამზადა კომპანია Randolph USA-მ.
Randolph USA 1978 წლიდან ამზადებს სპეციალურ სათვალეებს ამერიკელი და ნატო-ს მოკავშირეების მფრინავებისთვის.
თავის მხრივ, ვლადიმირ პუტინმაც გადასცა საჩუქარი პრეზიდენტ ბაიდენს.
კრემლის პრესსპიკერის, დმიტრი პესკოვის განცხადებით, პუტინმა ბაიდენს ხოხლომას ორნამენტებით გაფორმებული საწერი მაგიდის ნაკრები სახელად "მოსკვა" უსახსოვრა.