რუსეთის მთავრობამ შეერთებული შტატები და ჩეხეთი ოფიციალურად შეიყვანა რუსეთის მიმართ არამეგობრულად განწყობილი ქვეყნების ნუსხაში. შესაბამის განკარგულება, რომელსაც ხელს რუსეთის პრემიერ-მინისტრი მიშიუსტინი აწერს, დღეს გამოქვეყნდა.
"დამტკიცდეს თანდართული სია უცხო სახელმწიფოებისა, რომლებიც არაკეთილსინდისიერი ქმედებებით გამოირჩევიან რუსეთის ფედერაციის, რუსეთის ფედერაციის მოქალაქეებისა და რუსეთის იურიდიული პირების მიერ", - ნათქვამია განკარგულებაში.
ამასთან, განკარგულებით განსაზღვრულია თუ რამდენი თანამშრომლის აყვანა შეეძლებათ ამ სახელმწიფოებს თავიანთ დიპლომატიურ წარმომადგენლობებში.
განკარგულების თანახმად, ჩეხეთი უფლებამოსილია თავის დიპლომატიურ წარმომადგენლობაში აიყვანოს 19 თანამშრომელი, ხოლო შეერთებულ შტატებს - არცერთი. შეზღუდვები არ ვრცელდება აკრედიტებულ დიპლომატებზე.
მთავრობის ეს განკარგულება ეფუძნება რუსეთის პრეზიდენტის, ვლადიმირ პუტინის 23 აპრილის ბრძანებულებას "არამეგობრულად განწყობილი ქვეყნების ქმედებების საწინააღმდეგო ზომების გამოყენების შესახებ".
მაშინ პუტინმამ ამ ბრძანებულებას ვაშინგტონსა და პრაღასთან გამწვავებული ურთიერთობები ფონზე მოაწერა ხელი. პრაღამ მოსკოვი ვრბეტიცეში სამხედრო საწყობის აფეთქებაში მონაწილეობაში დაადანაშაულა და 18 რუსი დიპლომატი გააძევა. ვაშინგტონმა სანქციები დააწესა და ასევე გააძევა რუსი დიპლომატები აშშ-ის ფედერალურ სააგენტოებზე კიბერშეტევის საპასუხოდ, ასევე 2020 წლის არჩევნებში ჩარევის გამო.
მოსკოვი ტრადიციულად უარყოფს ყველა ბრალდებას.
