სომხეთის მოქმედი პრემიერ-მინისტრი ნიკოლ ფაშინიანი აცხადებს, რომ რუსეთის პრეზიდენტ ვლადიმერ პუტინს სამხედრო დახმარების თხოვნით მიმართა.
"გუშინ მიღწეულ იქნა შეთანხმება, რომ დღეს აზერბაიჯანის შეიარაღებულმა ძალებმა უნდა დატოვონ სომხეთის ტერიტორია. ეს შეთანხმება ნაწილობრივ შესრულებულია, არის ტერიტორიები, რომლებიც აზერბაიჯანელებმა დატოვეს. მაგრამ რადგან შეთანხმება სრულად არ შესრულებულა, დღეს მე მივმართე რუსეთის პრეზიდენტს სამხედრო დახმარების თხოვნით“, - განაცხადა ფაშინიანმა.
მისი თქმით, მოლაპარაკებებს აზერბაიჯანულ მხარესთან 102-ე რუსული სამხედრო ბაზის წარმომადგენლები შეუერთდნენ.
შეგახსენებთ, სომხეთის სიუნიქის რეგიონის ქალაქ გორისის ადმინისტრაციამ 12 მაისს განაცხადა, რომ აზერბაიჯანელმა სამხედროებმა რესპუბლიკის საზღვარი დაარღვიეს. დღეს დილით, სომხეთის თავდაცვის სამინისტრომ გაავრცელა ცნობა, რომ აზერბაიჯანის შეიარაღებული ძალები კვლავ რჩებიან სიუნიკის რეგიონში.
მოსკოვმა გაიზიარა ერევნის შეშფოთება აზერბაიჯანის მიერ სომხეთის საზღვრების გადმოკვეთასთან დაკავშირებით.
მანამდე ფაშინიანმა დაავალა თავდაცვისა და შინაგან საქმეთა სამინისტროებს, ეროვნული უშიშროების საბჭოს, რომ არსებული ვითარების გათვალისწინებით, დაიწყონ კონსულტაციების კოლექტიური უსართხოების ხელშეკრულების ორგანიზაციის ფარლგებში. ამ ორგანიზაციის წევრები სომხეთთან ერთად, არიან რუსეთი, ბელარუსი და ყაზახეთი.
აზერბაიჯანის საგარეო საქმეთა სამინისტრომ არაადეკვატური უწოდა სომხეთის განცხადებებს და მოუწოდა, არ გამოიყენონ ვითარება წინასაარჩევნო და შიდა პოლიტიკური მიზნებისთვის.
