თბილისის საქალაქო სასამართლოში დღეს "მთავარი არხის" გენერალური დირექტორის, ნიკა გვარამიას პროცესი გაგრძელდება. სხდომაზე ბრალდების მხარის მიერ წარდგენილი წერილობითი მტკიცებულების გამოკვლევა მოხდება.
ნიკა გვარამიას ადვოკატის დიმიტრი საძაგლიშვილის თქმით საქმე პოლიტიკურად მოტივირებულია და ყველა პროცესზე "მთავარი არხის" გენერალური დირექტორის უდანაშაულობა მტკიცდება.
"ნიკა გვარამიას პოლიტიკური დევნის საქმეზე მორიგი სასამართლო სხდომა გაიმართება, გაგრძელდება ბრალდების მხარის მტკიცებულებათა გამოკვლევა. რამდენადაც ჩვენთვის ცნობილია, ბრალდების მხარე ამ პროცესზე არ წარმოადგენს მოწმეს. ამ სასამართლო სხდომაზე გამოვიკვლევთ წერილობით მტკიცებულებებს. ღრმად ვართ დარწმუნებული, რომ როგორც მოწმეთა ჩვენებებით, ისე საქმეში არსებული წერილობითი მტკიცებულებებით ცალსახად დასტურდება, რომ ეს არის პოლიტიკური მოტივაციით წარდგენილი ბრალდება ნიკა გვარამიას მიმართ. არათუ დანაშაულის ჩადენას არ ჰქონია ადგილი, არამედ სამოქალაქო პასუხისმგებლობაზეც არ შეიძლება იყოს საუბარი. ვინაიდან სწორედ ნიკა გვარამიას დირექტორობის პერიოდში იყო რუსთავი 2 ყველაზე რეიტინგული და მაღალშემოსავლიანი ტელევიზია", - ამბობს ადვოკატი დიმიტრი საძაგლიშვილი.
"მთავარი არხის" გენერალურ დირექტორს პროკურატურა ედავება ჯერ კიდევ "რუსთავი 2"-ის დირექტორობის დროს, სამაუწყებლო კომპანიის კანონიერი ინტერესების საწინააღმდეგოდ უფლებამოსილების ბოროტად გამოყენებასა და მისი კუთვნილი დიდი ოდენობით თანხის სამსახურეობრივი მდგომარეობით გამოყენებას.
