მალაიზიაში გაიგზავნა ქართული მხარის წარმომადგენელი, რომელიც დაკავებული ქართველების საქმეს შეისწავლის.
ამის შესახებ დღეს ჟურნალისტებს საგარეო საქმეთა მინისტრმა გრიგოლ ვაშაძემ განუცხადა.
"ჩვენი წარმომადგენელი უკვე მალაიზიაშია, სადაც დაკავებული პირის საქმეს გაცნობა. ჩვენთვის ჯერ ისიც არ არის ცნობილი, დაკავებულებიდან საქართველოს მოქალაქე ერთია თუ ორი. ამ დროისთვის დგინდება დაკავებულის მოქალაქეობა, ვინაობა და რა ბრალდება აქვს წაყენებული", - აღნიშნა ვაშაძემ.
მისივე თქმით, მალაიზიაში დაკავებულებთან დაკავშირებით ზუსტ ინფორმაციას საზოგადოებას საგარეო საქმეთა მინისტრის მოადგილე ნინო კალანდაძე ორშაბათის ტრადიციულ ბრიფინგზე მიაწვდის.
"ჩვენ მივედით იმ ზომამდე, რომ, შესაძლოა, კანონდამრღვევების გათავისუფლებასთან დაკავშირებით, სახელმწიფოს რესურსი ამოეწუროს. არ გავქვს იმის საშუალება, რომ ყოველთვის გავათავისუფლოთ კანონდამრღვევები და ჩვენი მეგობრების კეთილგანწყობით მუდმივად ბოროტად ვისარგებლოთ", - აღნიშნა ვაშაძემ.
მან კიდევ ერთხელ მოუწოდა საქართველოს მოსახლეობას, სიფრთხილე გამოიჩინონ და არ ენდონ იმათ, ვინც ფაქტიურად ადამიანების ტრეფიკინგით არიან დაკავებულები.
