საქართველოს პრეზიდენტი სალომე ზურაბიშვილი, ბრიუსელში სამუშაო ვიზიტის ფარგლებში, ევროკომისიის პრეზიდენტს ურსულა ფონ დერ ლაიენს შეხვდა.
ზურაბიშვილთან შეხვედრას ურსულა ფონ დერ ლაიენი სოციალურ ქსელში გამოეხმაურა.
"სიამოვნებით ვუმასპინძლე საქართველოს პრეზიდენტს, შეხვედრისას კოვიდსიტუაცია განვიხილეთ. კიდევ ერთხელ გავიმეორე, რომ მზად ვარ, დავეხმარო ჩვენს მეზობლებს პანდემიისა და მისი ეკონომიკური შედეგების გადალახვაში. ერთად უფრო ძლიერები ვართ", - დაწერა ურსულა ფონ დერ ლაიენმა Twitter-ზე.
მანამდე სალომე ზურაბიშვილი ევროკომისარს ევროპული სამეზობლო პოლიტიკისა და გაფართოების საკითხებში ოლივერ ვარჰეი შეხვდა.
ოლივერ ვარჰეიმ კიდევ ერთხელ დაადასტურა ევროკავშირის მხარდაჭერა საქართველოს მიმართ „კოვიდ-19“-თან ბრძოლის პროცესში და ვაქცინაზე ადრეული წვდომის საკითხში.
"ევროკავშირი საქართველოს გვერდით დგას, მათ შორის ვაქცინაზე ადრეული წვდომის საკითხში. ჩვენ ასევე მხარს დავუჭერთ ეკონომიკურ განვითარებასა და აღდგენას", - განაცხადა ოლივერ ვარჰეიმ.
დღესვე საქართველოს პრეზიდენტი იუსტიციის საკითხებში ევროკომისარს, დიდიე რეინდერს შეხვდა.