ახალთერჯოლის 500-მდე ოჯახის სასმელი წყლით უზრუნველსაყოფად წყლის სისტემა მოეწყობა.
ტენდერში გამარჯვებულმა კომპანიამ შპს „მშენგრუპმა" ტერიტორიის გეოდეზიური კვლევა და წყლის დებეტის მოსაძიებელი სამუშაოები უკვე დაიწყო.
პროექტი ითვალისწინებს წყლის მიმწოდებელი მაგისტრალის, გამანაწილებელი ქსელის, რეზერვუარის, საქლორატორო ნაგებობის, აღრიცხვის კვანძებისა და სხვა საჭირო ნაგებობების მოწყობას.
აღნიშნული პროექტი თერჯოლის მუნიციპალიტეტის მერის ლაშა გოგიაშვილის ინიციატივითა და ჩართულობით ხორციელდება.
"ჩატარებულმა სამუშაოებმა ცხადყო, რომ წყლის დებეტი საკმარისია. ახალთერჯოლელებისათვის ეს იქნება საუკუნის პროექტი, რადგან წყლის პრობლემა ძალიან აწუხებს ადგილობრივებს. ზოგადად, ეს საკითხი ბევრ სოფელშია აქტუალური, განსაკუთრებით ზაფხულში. ადგილობრივი ხელისუფლება აქტიურად მუშაობს მუნიციპალიტეტის მოსახლეობისათვის წყალმომარაგების პრობლემის გადასაჭრელად", - აღნიშნა ლაშა გოგიაშვილმა.
