პარლამენტის ადამიანის უფლებათა კომიტეტის თავმჯდომარე სოფო კილაძე გაეროს ბავშვთა უფლებების კომიტეტის წევრად აირჩიეს. ინფორმაციას მიკრობლოგ "ტვიტერზე" გაეროში საქართველოს ელჩი კახა იმნაძე ავრცელებს.
საქართველოს მთავრობამ სოფიო კილაძე კომიტეტის წევრობის კანდიდატად 2020 წლის ზაფხულში წარადგინა. ამ ინფორმაციის გავრცელებისთანავე, საქართველოში მოქმედმა 53-მა არასამთავრობო ორგანიზაციამ მიმართა გაეროს კომიტეტს წერილობით, რომ არ დაეშვათ კომიტეტის წევრად სოფო კილაძის არჩევა.
"მიგვაჩნია, რომ საქართველოს პარლამენტის ადამიანის უფლებათა და სამოქალაქო ინტეგრაციის კომიტეტის ხელმძღვანელი, ქალბატონო სოფიო კილაძე არ უნდა იყოს არჩეული გაეროს ბავშვის უფლებათა კომიტეტის წევრად, რადგან არც მისი კვალიფიკაცია, არც რეპუტაცია და ადამიანის უფლებების რწმენა, ასევე კანდიდატის შერჩევის პროცესში გაეროს რეკომენდაციების აშკარა დარღვევა, არ იძლევა მისი შერჩევის საფუძველსა და ლეგიტიმაციას", - აცხადებდნენ არასამთავრობო ორგანზიაციები.
