პარლამენტი მთავრობას მომავლი წლის ბიუჯეტში ადგილობრივი მნიშვნელობის გზების რეაბილიტაციის საკითხის გათვალისწინებას სთხოვს. ამის შესახებ განცხადება პარლამენტის საფინანსო-საბიუჯეტო კომიტეტის თავმჯდომარემ ზურაბ მელიქიშვილმა 2011 წლის ბიუჯეტის პროექტის განხილვისას გააკეთა.
ფინანსთა მინისტრმა კახა ბაინდურაშვილმა კომიტეტის სხდომაზე მთავრობის პრიორიტეტებზე ისაუბრა და ერთ-ერთ პრიორიტეტად საგზაო ინფრასტრუქტურის რეაბილიტაცია დაასახელა. მელიქიშვილმა კი აღნიშნა, რომ ამის პარალელურად უნდა მოხდეს ადგილობრივი მნიშვნელობის გზების რეაბილიტაციაც.
იგი მთავრობას სთხოვს, ამ საკითხისათვის პროექტში დაახლოებით 40-45 მილიონი იქნას გათვალისწინებული. მელიქიშვილი იმედოვნებს, რომ ეს საკითხი უკვე ასახული იქნება მთავრობის მიერ პარლამენტისთვის დაბრუნებულ ბიუჯეტში.
მელიქიშვილი აცხადებს, რომ სხვა შენიშვნებთან დაკავშირებით კომიტეტი განცხადებებს საკითხის მეორე მოსმენით განხილვისას გააკეთებს.
