2010 წელს ჟინვალის უნიკალურ ჰიდროკომპლექსს ექსპლოატაციაში გაშვებიდან 25 წლისთავი შეუსრულდა. კომპანია "ჯორჯიან უოთერ ენდ ფაუერი", რომელიც ჰიდროკომპლექსის მართვას 2008 წლის მაისიდან ახორციელებს, ამ ღირსშესანიშნავ თარიღთან დაკავშირებით საიუბილეო ღონისძიების გამართვას გეგმავს.

იგეგმება საქართველოს აღმასრულებელი და საკანონმდებლო ხელისუფლების, თბილისის მერიისა და საკრებულოს, საერთაშორისო და არასამთავრობო ორგანიზაციების, საქართველოში აკრედიტებული დიპლომატიური კორპუსის, საქართველოს სამეცნიერო და საინჟინრო ინტელიგენციის, დამსახურებულ ენერგეტიკოსთა, ენერგოკომპანიების, საბანკო სექტორისა და მასმედიის წარმომადგენელთა მოწვევა.

ჟინვალის ჰიდროკომპლექსი 1985 წელს ამოქმედდა. ექსპლუატაციაში მისი გაშვებით სამი მთავარი ამოცანა გადაიჭრა: ქვეყნის დამატებითი ენერგორესურსით, დედაქალაქის სასმელი წყლითა და სასოფლო-სამეურნეო მიწების სარწყავი წყლით უზრუნველყოფა. ჟინვალის ჰიდროკომპლექსი დღესაც თბილისის წყალმომარაგების უმნიშვნელოვანესი ობიექტია: სასმელი წყლის 87% თბილისში ჟინვალიდან მოედინება; ჰიდროკომპლექსზე წარმოებული ელექტროენერგია საქართველოში გამომუშავებული ელექტროენერგიის 5-6%-ს შეადგენს.

2008-2010 წლებში, ჰიდროკომპლექსის საიმედოობის ასამაღლებლად "ჯორჯიან უოთერ ენდ ფაუერმა" სამშენებლო, სარემონტო და სარეკონსტრუქციო სამუშაო ჩაატარა; კომპანიის მხრიდან განსაკუთრებული ყურადღება ეთმობა კომპლექსის ძირითადი ჰიდრონაგებობების უსაფრთხო და საიმედო ექსპლუატაციას.

სარეკონსტრუქციო სამუშაოს ჩატარებამ ჟინვალჰესის გამომუშავებაზედაც დადებითად იმოქმედა. ბოლო ორი წლის განმავლობაში წარმოებული ელექტროენერგია სადგურის არსებობის ისტორიაში ერთ-ერთი რეკორდულია.