"იქონიებს თუ არა უარყოფით გავლენას ორი ისარელის მოქალაქე ბიზნესმენის ბათუმში დაკავება, ისრაელისა და საქართველოს ეკონომიკური ურთიერთობებზე?" - ამ კითხვით ისრაელის გაზეთმა "ჰაარეცმა" საქართველოს ეკონომიკისა და მდგრადი განვითარების მინისტრს, ვერა ქობალიას მიმართა.
გაზეთისთვის მიცემულ ინტერვიუში ქობალიამ განმარტა, რომ რამდენიმე წლის წინ, საქართველოს ხელისუფლებამ სხვა რეფორმებთან ერთად პოლიციის რეფორმაც განახორციელა, რის შედეგადაც 30,000 პოლიციელი სამსახურიდან იქნა დათხოვნილი. ქობალიას თქმით, საქართველოს ხელისუფლებამ ეს ნაბიჯი იმიტომ გადადგა, რომ სურდა ქვეყანაში კორუფცია საბოლოოდ აღმოეფხვრა.
"ახლა, ჩვენს ქვეყანაში ბიზნესმენები კორუფციისგან დაცულები არიან. მათ მხოლოდ გადასახადების გადახდა უწვეთ, სხვა არაფრის", - აღნიშნა ქობალიამ და დასძინა, რომ თუ ისრაელის მოქალაქე ბიზნესმენები უდანაშაულოები არიან, მათ საქართველოში თავიანთი სიმართლის დამტკიცების საშუალება ექნებათ.
ამის შემდეგ, ჟურნალისტმა ქობალიას ჰკითხა, ფლობდა თუ არა ინფორმაციას ისრაელის პრეზიდენტის შიმონ პერესის და საქართველოს პრეზიდენტის მიხეილ სააკაშვილის სატელეფონო საუბრის შესახებ, რომლის დროსაც პერესმა სააკაშვილს ისრაელის მოქალქეებისთვის სამართლიანი სასამართლო პროცესის უზრუნვეყოფა სთხოვა, რაზედაც ქობალიამ უპასუხა, რომ სააკაშვილთან მხოლოდ ეკონომიკის საკითხებზე საუბრობს და აღნიშულთან დაკავშირებით ინფორმაციას არ ფლობს.
"სააკაშვილთან მხოლოდ ეკონომიკის საკითხებზე ვსაუბრობ", - განაცხადა ქობალიამ.
შეგახსენებთ, რომ ცოტა ხნის წინ ქართველმა სამართალდამცველებმა ისრაელის მოქალაქე ბიზნესმენები, ფრენკ ზეერი და რონი ფუქსი დააკავეს. ორივე მათგანი მაღალი თანამდებობის სახელმწიფო მოხელისთვის ქრთამის მიცემაშია ეჭვმიტანილი.
დღეს ისრაელის პრესაში გავრცელდა ინფორმაცია, რომ ქვეყნის პრეზიდენტმა შიმონ პერესმა მიხეილ სააკაშვილს დაურეკა და დაკავებული ბიზნესმენების ბედით დაინტერესდა. გაზეთი "ჰაარეცი" ერთ-ერთ დაკავებულ რონ ფუქსს პერესის ახლო მეგობრად მოიხსენიებს.
