კომპანია "ჯორჯიან უოთერ ენდ ფაუერი", რომელიც ჰიდროკომპლექსის მართვას 2008 წლის მაისიდან ახორციელებს, ამ ღირსშესანიშნავ თარიღთან დაკავშირებით საიუბილეო ღონისძიების გამართვას გეგმავს.

საიუბილეო ცერემონიალი შედგება ხვალ, 20 ოქტომბერს;

ფორმატით გათვალისწინებულია საქართველოს აღმასრულებელი და საკანონმდებლო ხელისუფლების, თბილისის მერიისა და საკრებულოს, საერთაშორისო და არასამთავრობო ორგანიზაციების, საქართველოში აკრედიტებული დიპლომატიური კორპუსის, საქართველოს სამეცნიერო და საინჟინრო ინტელიგენციის, დამსახურებულ ენერგეტიკოსთა, ენერგოკომპანიების, საბანკო სექტორისა და მას-მედიის წარმომადგენელთა მოწვევა.

ჟინვალის ჰიდროკომპლექსი 1985 წელს ამოქმედდა. ექსპლუატაციაში მისი გაშვებით სამი მთავარი ამოცანა გადაიჭრა: ქვეყნის დამატებითი ენერგორესურსით, დედაქალაქის სასმელი წყლითა და სასოფლო-სამეურნეო მიწების სარწყავი წყლით უზრუნველყოფა. ჟინვალის ჰიდროკომპლექსი დღესაც თბილისის წყალმომარაგების უმნიშვნელოვანესი ობიექტია: სასმელი წყლის 87% თბილისში ჟინვალიდან მოედინება; ჰიდროკომპლექსზე წარმოებული ელექტროენერგია საქართველოში გამომუშავებული ელექტროენერგიის 5-6%-ს შეადგენს.

2008-2010 წლებში, ჰიდროკომპლექსის საიმედოობის ასამაღლებლად "ჯორჯიან უოთერ ენდ ფაუერმა" რიგი სამშენებლო, სარემონტო და სარეკონსტრუქციო სამუშაოები ჩაატარა; კომპანიის მხრიდან განსაკუთრებული ყურადღება ეთმობა კომპლექსის ძირითადი ჰიდრონაგებობების უსაფრთხო და საიმედო ექსპლუატაციას.

სარეკონსტრუქციო სამუშაოების ჩატარებამ ჟინვალჰესის გამომუშავებაზეც დადებითად იმოქმედა. ბოლო ორი წლის მანძილზე წარმოებული ელექტროენერგია სადგურის არსებობის ისტორიაში ერთ-ერთი რეკორდულია.